Category:

ENFÒMASYON

ENFÒMASYONENTÈNASYONAL

IJAN : Diego Maradona mouri ak yon pwoblèm kè nan peyi Ajantin

by Kreyòl Enfo
Kreyòl Enfo

Kreyòl Enfo, 25 novanm 2020.- Pi gran jwè nan listwa foutbòl peyi Ajantin nan, Diego Armando Maradona, mouri jodi mèkredi a (25) lakay li nan vil Tigre. Daprè jounal Clarín, zetwal foutbòl mondyal la rann dènye souf li aprè yon pwoblèm nan kè.

Diego Maradona te fè yon operasyon nan sèvo nan kòmansman mwa novanm nan. Uit (8) jou aprè operasyon an medsen yo te libere  «pibe de ouro» a pou retounen lakay li. Doktè Leopoldo Luque fè kwè operasyon an te byen senp, men li te preyokipe pou kondisyon sante ansyen foutbolè a ki te deja frajil. Chanpyon mondyal nan lane 1986, Maradona mouri malgre pwòch fanmi an te anonse semèn pase a pa gen okenn menas sou lavi vedèt la.

Diego Armando Maradona, 60 lane, make listwa foutbòl sitou aprè 2 gòl li te make kont Angletè a. Imaj youn nan gòl yo te fè laviwonn tout mond la sou non  » men Bondye ( la main de Dieu) ».  Lòt gòl la, kote Maradona te drible mwatye nan ekip anglè a (ak tout gadyen an), te ranpòte, nan lane 2002, pri FIFA pou pi bèl gòl nan listwa Koupdimond.

Maradona te jwe tou mondyal 1982,1990 ak 1994. Nan lane 2010, lejand foutbòl la te dirije seleksyon Ajantin nan pandan Mondyal ki te dewoule sou kontinan afriken an.

 

Kreyòl Enfo

0 comments
ENFÒMASYON

IJAN : Léon Charles ranplase Normil Rameau nan tèt Polis Nasyonal Ayiti a

by Kreyòl Enfo
Kreyòl Enfo

Kreyòl Enfo, 16 novembre 2020.- Nan yon arete prezidansyèl ki pibliye nan jounal ofisyèl Le Moniteur maten lendi 16 novanm nan, Chèf Leta a nome sitwayen Léon Charles kòm nouvo Direktè Jeneral pou yon ti bout tan Polis Nasyonal Ayiti a (PNH, sig nan lang franse). Léon Charles ranplase Normil Rameau ki sot pase anviwon yon lane nan tèt enstitisyon an.

Nouvo Direktè Jeneral lapolis la te deja dirije enstitisyon an nan pandan gouvènman tranzisyon Boniface Alexandre ak Gérard Latortue a. Li te remèt demisyon li nan lane 2005 aprè anpil kritik sou fason li t ap dirije PNH la.

Léon Charles se yon ansyen manm tou nan fòs lame Ayiti a. Li te reprezante Ayiti nan Òganizasyon Leta Amerik yo (OEA, sig nan lang franse).

Kreyòl Enfo

0 comments
AKTYALITEENFÒMASYON

IJAN : Francois Anick Joseph, ansyen senatè Latibonit, mouri britsoukou nan peyi Kanada

by Kreyòl Enfo
Kreyòl Enfo

Kreyòl Enfo, 27 oktòb 2020.- Ansyen senatè Latibonit la, François Anick Joseph, mouri aprè midi madi 27 oktòb la nan peyi Kanada. Daprè enfòmasyon ki rive jwenn redaksyon Kreyòl Enfo (KE), ansyen minis enteryè ak kolektivite tèritoryal yo mouri britsoukou aprè yon kriz kè.

François Anick Joseph te senatè nan depatman Latibonit anba chapo pati Òganizasyon Pèp k ap Lite (OPL). Li te okipe pòs minis enteryè pandan pouvwa tranzisyon Jocelerme Privert t ap dirije a.

Senatè François Anick Joseph, 58 lane, te pwofesè sosyoloji nan plizyè fakilte nan peyi a.

Kreyòl Enfo

0 comments
ENSEKIRITEENFÒMASYON

IJAN : Bandi ak zam kidnape ansyen foutbolè Johnny Descolines

by Kreyòl Enfo
Kreyòl Enfo

Kreyòl Enfo, 22 oktòb 2020.- Bandi ak zam kidnape, aswè mèkredi 21 oktòb la, ansyen atakan seleksyon nasyonal foutbòl la Johnny Descolines nan zòn Dèlma 33. Se ansyen konpayèl li nan seleksyon an Ernso Laurence ki konfime enfòmasyon an pou redaksyon Kreyòl Enfo.

Bandi ki kidnape Johnny Descolines yo deja kontakte fanmi an epi mande  » anpil lajan », daprè Ernso Laurence ki rèsponsab pak Sent Terèz, nan komin Petyonvil.

Johnny Descolines se grenadye ki te konn briye nan seleksyon nasyonal la. Li te pote koulè ekip vyolèt la pandan plizyè lane.

Kreyòl Enfo

0 comments
ENFÒMASYONJISTIS

IJAN : 5 polisye ki t ap siveye kay Mèt Monferrier Dorval yo fèmen penitansye ak tout inifòm

by Kreyòl Enfo
Kreyòl Enfo

Kreyòl Enfo, 11 septanm 2020.- Chèf pakè Pòtoprens la, Mèt Ducarmel Gabriel, pase lòd, jodi vandredi a (11), pou fèmen nan penitansye nasyonal senk (5) polisye ki t ap siveye kay batonye Monferrier Dorval, Peleren 5, aprè asasina 28 dawout pase a.

Malgre plizyè tantativ redaksyon Kreyòl Enfo (KE), pakè Pòtoprens poko bay twòp detay sou rezon ki pouse Mèt Ducarmel Gabriel voye polisye yo fèmen nan penitansye nasyonal.

Plizyè polisye denonse desizyon komisè gouvènman Pòtoprens la yo di pa respèkte enstitisyon lapolis la. Lidè politik nan opozisyon an ki deja reyaji sou dosye kwè se yon estrateji pouvwa a ap itilize pou kache idantite prensipal moun ki komèt krim nan.

Senk (5) polisye komisè gouvènman an fèmen nan prizon yo se Dodley Pierre, Mackenson Cléus, Mackenson Prévil, Angou M. Orcel ak Sénèque Jean Louis.

Kreyòl Enfo

0 comments
AKTYALITEENFÒMASYON

Asasina Monferrier Dorval : fanmi viktim nan chwazi dat ak lokal pou chante lantèman an

by Kreyòl Enfo
Kreyòl Enfo

Kreyòl Enfo, 8 septanm 2020.- Prèske 2 semèn aprè bandi ak zam te fin asasine batonye lòd avoka Pòtoprens yo, Mèt Monferrier Dorval, otorite yo remèt kadav la bay fanmi viktim nan.

Daprè enfòmasyon redaksyon Kreyòl Enfo (KE) konfime, lantèman Mèt Monferrier Dorval ap chante nan legliz Sen Pyè, komin Petyonvil, jedi 18 septanm k ap vini la a. Anpil mobilizasyon ap fèt nan mitan divès sektè nan peyi a pou bay yon dènye ochan ak batonye a ki te konn fè kou tou nan plizyè Inivèsite.

Pandan planifikasyon ap fèt pou lantèman konstitisyonalis la, gwo mouvman pwotestasyon ap rapouswiv nan kapital la ak divès lòt vil pou denonse zak asasinay sa epi mande Leta frennen fenomèn ensekirite a.

Komisè gouvènman Pòtoprens la, Mèt Durcamel Gabriel, envite plizyè avoka ansanm ak sekretè prive Mèt Dorval nan kad ankèt pakè deja louvri pou fè limyè sou krim nan.

Kreyòl Enfo

0 comments
DYASPORAENFÒMASYON

Repiblik Dominikèn : 5 ayisyen mouri nan yon aksidan machin zòn Baharona

by Kreyòl Enfo
Kreyòl Enfo

Kreyòl Enfo, 31 dawout 2020.- Senk (5) sitwayen ayisyen mouri, dimanch 30 dawout pase a, epi twa (3) lòt blese byen grav nan yon aksidan machin sou wout Cabral-Polo a, nan pwovens Barahona.

Daprè enfòmasyon plizyè medya dominiken, aksidan sa rive nan moman yon kamyon mak Daihatsu, koulè blanch, ki t ap transpòte pasaje etranje te pèdi fren epi al chavire nan yon barank. Nan kamyon sa ki te genyen pou pi piti 30 ayisyen te chaje tou ak machandiz.

Reprezantan Ayiti nan konsila Baharona a nou te kontakte di yo poko konnen itantite konpatriyòt ki mouri yo.

Kreyòl Enfo

0 comments
ENFÒMASYONENSEKIRITE

IJAN : Mèt Monferrier Dorval, batonye lòd avoka Pòtoprens yo, mouri anba bal bandi

by Kreyòl Enfo
Kreyòl Enfo

Kreyòl Enfo, 28 dawout 2020.- Bandi ak zam otorite yo poko idantifye touye anba bal, aswè vandredi 28 dawout la, Mèt Monferrier Dorval lakay li nan zòn Pèleren 5, komin Petyonvil. Yon pwòch avoka a ki konfime enfòmasyon an pou redaksyon Kreyòl Enfo presize Mèt Dorval resevwa plizyè katouch.

Imaj ki deja ap fè laviwonn rezo sosyal yo montre kadav Mèt Monferrier Dorval ap benyen nan san li atè a tou pre yon machin. 2 pòt devan machin nan rete tou louvri. Batonye lòd avoka Pòtoprens yo sanble te nan machin nan pandan atak la.

Mèt Monferrier Dorval se youn nan konstitisyonalis moun plis rèspekte nan sosyete a. Li toujou pataje opinyon li sou anpil gwo dosye politik k ap fè deba nan sosyete a.

Yon lòt fwa ankò, machin ensekirite a wete lavi youn nan gwo entèlektyèl ki t ap sèvi peyi a.

Kreyòl Enfo

0 comments
ENFÒMASYONAKTYALITE

Lanmò : Ernst Jean Joseph, youn nan ewo seleksyon 1974 la, mouri britsoukou

by Johnson DEROSIN
Johnson DEROSIN

Kreyòl Enfo, 14 dawout 2020.- Dèy nan mitan foutbòl ayisyen an. Defansè Ernst jean Joseph moun plis konnen sou non « Tinès » ki te patisipe nan Koupdimond foutbòl 1974 la ak seleksyon nasyonal la mouri, maten vandredi 14 dawout 2020 an, lakay li nan komin Pòtoprens. Daprè enfòmasyon Kreyòl Enfo konfime, Tinès mouri britsoukou, san li pat kouche malad.

Ernst Jean Joseph te jwe nan Asosyasyon Espòtiv Kapwaz (ASC, sig nan lang franse) ak Vyolèt Atletik Klèb (VAC). Li te pote tou koulè ekip « Sting de Chicago », yon klèb dezyèm divizyon nan peyi Etazini.

Foutbolè ayisyen an ki te gen 72 lane rann dènye souf li aprè « yon senp ti malèz », daprè yon pwòch fanmi an. Li eksplike Ernst Jean Joseph te gentan manje epi bay blag ak kèk moun nan lantouray li avan li mouri.

Tinès se te yon pilye nan gwo seleksyon nasyonal foutbòl ki jwe mondyal 1974 la nan peyi Almay. Yon seleksyon ki make listwa foutbòl ayisyen an. Plizyè pèsonalite ak asosyasyon nan sektè espò a reklame fineray nasyonal pou Ernst Jean Joseph yo konsidere kòm pi gran « libero » nan listwa foutbòl ayisyen an.

Kreyòl Enfo

0 comments
ENFÒMASYONENTÈNASYONAL

Entènasyonal : eksplozyon nan peyi Liban, plis pase 100 moun mouri epi 4 000 lòt blese

by Kreyòl Enfo
Kreyòl Enfo

Kreyòl Enfo, 5 dawout 2020.- Lakwa Wouj nan peyi Liban konfime nan yon dènye bilan maten mèkredi a (5) plis pase 100 moun mouri epi 4 mil lòt blese pandan 2 eksplozyon nan kapital peyi a, Beywout, ayè madi a. Ensidan sa rive tou pre pò vil la kote ki gen anpil gwo depo.

Prensipal lopital Beywout yo debòde ak viktim ki vin bouske laswenyay, daprè yon rèsponsab Lakwa Wouj. Li souliye youn nan pi gwo lopital vil la, St George Hospital, oblije fèmen pòt li epi voye malad yo lòt kote aprè dega eksplozyon yo fè nan lokal enstitisyon an.

Plizyè lòt lopital sibi gwo konsekans tou nan eksplozyon sa yo, pami yo Bikhazi Medical Group ki gen sèlman 60 kabann pou anviwon 500 malad, daprè plizyè medya lokal. Divès peyi nan rejyon an pwomèt vou voye medikaman ak pwofesyonèl lasante bay bourad ak otorite libanè yo.

Premye enfòmasyon yo fè kwè ensidan sa rive nan yon depo ki te genyen nitrat amonyòm. Otorite libanè yo monte yon komisyon espesyal pou mennen ankèt epi fè tout limyè sou eksplozyon sa yo nan yon delè 5 jou.

 

Kreyòl Enfo

0 comments
Newer Posts
Older Posts
kreyolenfo.com. Tout dwa yo rezève.