ENFÒMASYON

Kreyòl Enfo, 27 jen 2020.- Endividi otorite yo poko idantifye simen katouch, nan lanwit vandredi pou louvri samdi 27 jen an, sou yon jèn animatè mizik ki gen non atis « DJ Kabwa » nan vil Gonayiv, depatman Latibonit.a

Bandi yo wete lavi atis la pandan li t ap soti nan yon pwogram ki rele « Atè Plat », daprè enfòmasyon yon pwòch viktim nan pataje ak kolaboratè Kreyòl Enfo nan site lendepandans la.

« DJ Kabwa » moun Gonayiv prezante tankou yon jèn ki boure talan ta yon pwòch senatè Youri Latortue. Fanmi atis la mande otorite yo fè limyè sou zam asasinay sa epi pini koupab yo.

Fenomèn ensekirite a pa sispann ogmante nan site lendepandans la. Malgre anpil dispozisyon otorite nan lapolis ak lajistis di yo pran pou kwape bandi, sitwayen yo kontinye ap viktim chak jou pi plis.

Kreyòl Enfo

Kreyòl Enfo, 26 jen 2020.- Sèt (7) moun mouri ak plizyè lòt soti blese, aprè midi jedi 26 jen an, pandan yon fiziyad nan komin Gantye, depatman Lwès. Dram sa pase nan sant komin nan tou pre lokal komisarya, konplèks administratif ak sant sante a.

Yon temwen ki pale ak redaksyon Kreyòl Enfo (KE) nan telefòn eksplike《se yon endividi ki t ap tante vole yon machin bò 2zè konsa. Mèt machin nan ki wè sa kouri pou anpeche vòlè a pati ak machin nan.》Malerezman, 《endividi sa sezi yon zam ki te nan machin nan epi tonbe simen katouch nan tout direksyon. 4 moun mouri lapoula, 2 lòt ki te blese byen grav pèdi lavi yo nan chimen lopital》, toujou daprè temwen an.

Aprè fiziyad la, popilasyon an mete lapat sou prezime kriminèl la ki te gentan nan men lapolis epi touye l anba kout wòch ak kout manchèt. Yon rèsponsab lapolis nan komin Gantye di, daprè temwayaj abitan nan zòn nan, endividi ki komèt krim nan ta yon depòte ki gen pwoblèm mantal.

Abitan nan komin Gantye ak zòn ki viwonnen l yo sou gwo chòk aprè fiziyad sa. Pandan tout jounen vandredi a, dram nan te nan mitan prèske tout diskisyon sitwayen yo.

Kreyòl Enfo

Kreyòl Enfo, 3 avril 2020 .- Pandan tout moun konsantre sou pandemi nouvo kowonaviris la, plizyè jenn fanm pran plezi nan fouye moun anba lavil la, daprè sa yon kolaboratè Kreyòl Enfo konstate.

Yon machanm k ap pwonmennen rad bò mache tèt bèf eksplike  » mèdam yo ap mache byen abiye epi lè yo rive bò kote w yo rale kouto epi mande w tout lajan ki nan men w  » Machanm rad la di genyen nan jenn fanm sa yo ki itilize « jilèt ak pik  » tou pou komèt zak yo.

» Yo pa jwazi moun pou yo fouye. Ni machann, ni moun ki vin achte pase anba men mèdanm sa yo », pawòl machann rad la ki kwè se bandi ki kontwole zòn Lasalin ak Pòtay Sen Jozèf ki voye jenn fanm sa yo dechèpiye moun.

Plizyè ti machann anba lavil la denonse konpòtman polisye ki nan komisarya Sen Jozèf la, tou pre mache a, yo di ki pa fè anyen pou mete bout nan aksyon bandi yo.

Kreyòl Enfo

Kreyòl Enfo, 22 jiyè 2019.- Sonine Mathurin pèdi lavi l, ayè dimanch la (21 jiyè), aprè li te fin resevwa plizyè kout kouto anba men mari l Sanès Guerrier nan lokalite Koray, 2e seksyon kominal Tigwav (Lwès).

Viktim nan mouri kite 3 pitit, daprè youn nan jij depè komin nan, Délicio Vernevil, ki te fè konsta legal yo. Majistra a sispèk se jalouzi ki ta lakoz Sanès Guerrier komèt krim nan.

Aprè zak la, kriminèl la gentan chape poul li pou fòs lòd yo pa arete l.

Kantite moun k ap viktim akoz pwoblèm jalouzi sanble ap ogmante nan peyi a. Semèn pase a, yon kad nan Ministè jenès espò ak aksyon sivik (MJSAC) te touye madanm li ak 3 bal epi sove kite kay la.

Kreyòl Enfo