Category:

SOSYETE

AKTYALITESOSYETE

4 moun mouri, 2 disparèt, anpil kay kraze : bilan pwovizwa move tan k ap frape peyi a

by Kreyòl Enfo
Kreyòl Enfo

Kreyòl Enfo, 28 oktòb 2026.- Pou pi piti 4 moun mouri, 2 disparèt epi 3 lòt soti blese akoz move tan k ap frape peyi a pandan denyè jou sa yo, daprè yon bilan pwovizwa Direksyon Pwoteksyon Sivil pataje ak Kreyòl Enfo. Rèsponsab yo presize 2 nan moun ki mouri yo t ap viv nan depatman Nip, youn nan Sid epi youn nan Grandans.

Moun ki disparèt yo se 2 pechè nan depatman Grandans. Gen 3 lòt moun ki blese tou pandan move tan sa, toujou daprè bilan pwovizwa Direksyon Pwoteksyon Sivil.

Lapli k ap tonbe san rete nan divès depatman lakoz anviwon 850 kay kraze, 219 andomaje epi plis pase 2130 kay inonde. Nan Grandans, yon glisman tè bloke wout nasyonal nimewo 7 la (RN7).

Larivyè k ap desann ravaje jaden epi bwote bèt peyizan yo tou nan depatman Nip, Grandans ak Sid. Plizyè obsèvatè kwè katastwòf ki frape rejyon Sid peyi a pral ogmante lamizè nan zòn nan kote sitwayen yo te deja ap viv nan kondisyon difisil.

Kreyòl Enfo

0 comments
AKTYALITESOSYETE

Kreyòl Enfo ap ekri depi 10 lane, ayisyen tribòbabò konprann

by Kreyòl Enfo
Kreyòl Enfo

Kreyòl Enfo, 7 oktòb 2026.- Premye medya nimerik nan lang kreyòl ayisyen, Kreyòl Enfo (KE) ap selebre 10e anivèsè l jounen mèkredi 7 oktòb 2026 la. Depi li fin boujonnen nan lane 2016, Kreyòl Enfo tounen youn nan premye sous enfòmasyon pou ayisyen nan katkwen peyi a ak nan dyaspora a. Yon platfòm ki bay tout sitwayen lavwa ochapit epi pèmèt yo konprann sa yo li ak sa yo tande san grate tèt.

Anba lobedyans Pwopriyetè epi Dirèktè Jeneral li, Johnson DEROSIN, Kreyòl Enfo se yon zouti pou konsyantize sou nesesite pou medya yo itilize kreyòl, lang ki pote idantite pèp ayisyen an. Kreyòl Enfo ofwi tèt li tou kòm platfòm pou ekspoze tout travay syantifik ki pwodwi nan lang kreyòl. Plis nou itilize epi pwodwi nan lang kreyòl se plis motè rechèch ak entèlijans atifisyèl yo vin pi enterese ak lang pèp ayisyen an.

Kreyòl Enfo gen anpil rekonesans pou dividal moun k ap swiv li sou rezo sosyal yo ak sit entènèt li a. Li remèsye tou ansanm kolaboratè ki pèmèt li trete epi pataje enfòmasyon verifye ak sitwayen yo.

Kreyòl Enfo

0 comments
SOSYETEAKTYALITE

Yon 11e bouji pou La Brève Info, Jean Michel Sincère lonje dwèt sou danje ki menase medya nimerik yo

by Kreyòl Enfo
Kreyòl Enfo

Kreyòl Enfo, 29 septanm 2026.- Medya nimerik La Brève Info selebre 11e anivèsè li jodi madi 29 septanm 2026 la. Pwopriyetè epi Dirèktè Jeneral La Brève Info a, jounalis Jean Michel Sincère, pwomèt l ap kontinye fè yon travay pwofesyonèl epi pataje enfòmasyon ki verifye ak sitwayen yo.

Jounalis la ki di li konstate ak anpil satisfaksyon medya nimerik yo se youn nan premye sous enfòmasyon sitwayen yo, regrèt kontwòl ki pa genyen nan sektè a. Jean Michel Sincère di se yon danje pou pwofesyon jounalis la lè nenpòt moun ki kreye yon paj sou Facebook rele tèt li jounalis san rèspekte egzijans metye a. Li siyale pwoblèm mwayen ki anpeche medya yo angaje bon jan teknisyen ak jounalis pwofesyonèl pou pi byen sèvi popilasyon an sitou nan vil pwovens yo.

Rèsponsab La Brève Info a se youn nan manm fondatè RENAMEL ( Rezo Nasyonal Medya Nimerik yo),  yon estrikti k ap  akonpaye medya yo. Jean Michel Sincère swete gen plis fòmasyon ki fèt pou jounalis miltimedya yo li raple k ap travay nan kondisyon difisil.

La Brève Info ap kontinye devlope pou ofri plis opsyon pou sitwayen yo ka gen aksè ak bon jan enfòmasyon, daprè Jean Michel Sincère. Li pwofite remèsye tout moun k ap swiv yo sou rezo sosyal yo ansanm ak ekip redaksyon an.

Kreyòl Enfo pwofite okazyon an pou swete yon bon 11e anivèsè ak tout ekip La Brève Info a.

Kreyòl Enfo

0 comments
AKTYALITESOSYETE

Haiti24, deja 9 lane ap enfòme popilasyon an

by Kreyòl Enfo
Kreyòl Enfo

Kreyòl Enfo, 29 septanm 2026.- Jodi madi 29 septanm sa fè 9 lane depi medya nimerik Haiti24 angaje l pou enfòme ak fòme sitwayen yo. Avèk yon dividal moun k ap swiv li sou Facebook, X, Instagram ak sit web yo, Haiti24 se yon referans nan medya nimerik k ap bay enfòmasyon politik, ekonomik ak sosyal sou Ayiti ak dyaspora a.

Pwopriyetè Haiti24 la, Anderson Guillaume, pa kache satisfaksyon li pou kontribisyon li di medya nimerik yo pote nan pèmèt tout moun gen aksè ak bon jan enfòmasyon. Li siyale medya l ap dirije a deja pèmèt limyè fèt sou plizyè gwo dosye nan sosyete a. Anderson Guillaume anonse pwojè Haiti24 la ap kontinye devlope toujou nan lide pou pi byen sèvi sitwayen yo.

Haiti24 se youn nan manm fondatè Rezo Nasyonal Medya Nimerik yo, RENAMEL, yon estrikti k ap apiye, ankadre epi ede medya nimerik yo devlope Ayiti.

Tout ekip Kreyòl Enfo a swete yon bon 9e anivèsè ak Haiti24 epi salye pèseverans ak angajman li nan sosyete a.

Kreyòl Enfo

0 comments
ENSEKIRITEENFÒMASYONSOSYETE

Legliz katolik deside fèmen pòt lekòl, Inivèsite, sonnen klòch epi chante mès pou denonse fenomèn kidnaping la

by Kreyòl Enfo
Kreyòl Enfo

Kreyòl Enfo, 14 avril 2021.- Legliz Katolik endiye aprè dapiyanp bandi 400 Mawozo yo fè, dimanch pase a, sou yon gwoup relijye pandan yo ta pral asiste enstalasyon pè Jean Anèl Joseph kòm kire pawas Galèt Chanbon. Legliz la presize gen 4 pè ak 2 sè katolik epi 3 lòt relijye ki anba men bandi yo. 2 pami viktim yo se sitwayen fransè.

Nan yon nòt ki pibliye madi 13 avril la, konferans evèk yo mande pou tout lekòl, inivèsite ak tout lòt enstitisyon ki pou legliz katolik rete ak pòt yo fèmen jou k ap jedi 15 avril 2021 an. Evèk yo anonse tout klòch legliz nan tout peyi a ap sonnen nan lè midi jedi 15 avril la tou nan lide yo di pou mande Bondye chanjman pou Ayiti.

Tout evèk katolik yo ap reyini nan legliz Sen Pyè ki nan komin Petyonvil pou selebre yon mès nan lè midi, jedi 15 avril la, toujou daprè sa ki ekri nan nòt la.

Bandi ki nan gang 400 Mawozo yo egzije yon milyon dola vèt pou libere relijye yo.

Kreyòl Enfo

0 comments
ENSEKIRITESOSYETE

Dram : 6 moun mouri anba bal pandan yon seremoni vodou nan komin Senrafayèl

by Kreyòl Enfo
Kreyòl Enfo

Kreyòl Enfo, 9 janvye 2021 .- Dram nan komin Senrafayèl (depatman Nò) kote bandi louvri kout zam epi touye pou pi piti sis (6) moun nan lokalite Savann Dyann pandan yon seremoni vodou wougan Aronce Garçon t ap dirije pou konbat bandi k ap vòlò bèt peyizan yo nan kanton an. Ajan egzekitif k ap dirije lameri Senrafayèl la, Moise Ménéide, ki pale ak redaksyon Haitiinfospro.com (HIP) eksplike se pandan seremoni an ap dewoule epi yon gwoup bandi debake epi simen katouch sou peyizan yo.

HIP ki rapòte pawòl premye sitwayen Senrafayèl la presize pami moun ki mouri nan fiziyad sa gen wougan Aronce Garçon, Minouse, Milien, Odino ak Dokiyè. Gen yon lòt sitwayen ki blese byen grav tou anba bal bandi yo.  Poko gen yon arèstasyon ki fèt aprè dram sa, daprè yon sitwayen nan zòn nan.

Moise Ménéide rekonèt sitiyasyon an malouk anpil nan komin Senrafayèl pandan dènye tan sa yo. Plizyè sitwayen oblije abandone kay yo pou yo pa viktim anba men bandi k ap fè lalwa nan komin nan.

Kreyòl Enfo

0 comments
ENFÒMASYONSOSYETE

Meyak, yon lokalite nan depatman Nòdès, ap fè fas ak gwo pwoblèm dlo

by Kreyòl Enfo
Kreyòl Enfo

Kreyòl Enfo, 13 me 2020 .- Nan moman epidemi nouvo kowonaviris la ap pran teren nan peyi a, abitan nan zòn Meyak, yon lokalite nan komin Ferye ( Nòdès), gen gwo difikilte pou jwenn dlo pou yo bwè, daprè enfòmasyon Tripfoumi Enfo.

Sitwayen nan zòn nan peye jiska 20 goud pou yon bokit dlo. Pafwa, yo oblije janbe fwontyè a pou al bouske tigout dlo jouk sou tèritwa dominiken an. Yon egzèsis ki parèt disifil sitou aprè dispozisyon otorite 2 peyi yo pran pou fèmen fwontyè a akoz kovid-19 la.

TFE rapòte se òganizasyon World Vision ki gen yon pwojè distribisyon dlo nan zòn nan. Peyizan yo peye 4 750 goud chak mwa pou òganizasyon an ba yo ti dlo. Pwojè sa a ki touche 163 pami anviwon 3 000 moun k ap viv nan lokalite a ap fini nan mwa jen k ap vini la a.

Mete sou pwoblèm dlo a, moun nan lokalite Meyak ap fè fas ak pwoblèm grangou tou. Lapli ki pa tonbe depi kèk tan lakoz anpil jaden pèdi. Fwontyè Ayiti ak Sendomeng ki fèmen an tou rann sitiyasyon sitwayen sa yo pi difisil.

Leta ayisyen gen obligasyon pou voye je gade moun Meyak k ap monte yon maswife anba lamizè. Lokalite Meyak sitiye nan yon distans 9 kilomèt ak komin Fòlibète.

Kreyol Enfo

0 comments
JISTISSOSYETE

Pou yon plat manje, yon ti ayisyen pase 12 mwa nan prizon; entènot yo revòlte

by Johnson DEROSIN
Johnson DEROSIN

Kreyòl Enfo, 22 avril 2020 .- Nouvèl yon ti ayisyen ki te pase 12 mwa fèmen nan prizon sèlman paske li te pran yon plat manje kay yon vwazin revòlte sitwayen yo. Sou rezo sosyal yo, entènot yo pwofite raple yon seri desizyon kèk jij konn pran pou libere kidnapè, machann dwòg ak moun ki nan kontrebann san rèspekte lalwa.

« Yo kenbe yon ansyen depite ak yon pakèt dwòg, li fè 11 mwa nan prizon. Yon timoun pran yon asyèt manje, li fè 1 lane ap boule prizon. Se moun yo [otorite] ye? » kòmantè yon sitwayen sou Twitè. Yon lòt ekri  » Ayiti, peyi espesyal! Moun nan prizon pou manje epi vòlè lajan PetwoKaribe a ap banbile ».

Sou Fesbouk yon entènot di « nan peyi ki gen jistis, yo ta dwe arete jij ki te kondane timoun nan ». Li ajoute  » si se te yon gwo zotobre, yo t ap di l ale pa fè sa ankò menm jan ak Sonson Lafamilia ».

Tribinal pou timoun (TPE, sig nan lang franse) nan tèt kole ak pakè Pòtoprens libere tibway la, ayè mèkredi a (22), nan kad pwogram espesyal pou libere kèk prizonye pandan epidemi nouvo kowonaviris la.

Kreyòl Enfo

0 comments
SANTESOSYETE

Marc Jean Baptiste, enjenyè ki konstwi lokal Septan an (Feu Vert) mouri ak kowonaviris

by Kreyòl Enfo
Kreyòl Enfo

Kreyòl Enfo, 7 avril 2020 .- Nouvo kowonaviris la k ap fè ravaj nan peyi Etazini pa epanye kominote ayisyèn nan. Jodi madi a (7), enjenyè achitèk Marc Jean Baptiste mouri aprè li te fin kontamine ak viris la nan vil New York, daprè sa yon pwòch fanmi an konfime.

Marc Jean Baptiste te deja ap soufri ak lòt maladi avan li te enfekte ak kovid-19 la. Madanm enjenyè a ki kontamine ak viris la tou kouche sou kabann lopital.

Enjenyè Marc Jean Baptiste te trase plan epi sipèvize konstriksyon Feu Vert Night Club nan lane 1967. Klèb fanatik Septan yo te bay enjenyè Jean Baptiste yon ochan espesyal nan lane 2018, nan lokazyon 70e anivèsè djaz la.

Kreyòl Enfo voye senpati li pou gran Òkès Septantriyonal ak tout fanatik li yo nan moman kalamite sa.

Kreyòl Enfo

0 comments
KILTISOSYETE

Yon fèstival entènasyonal vodou nan vil Gonayiv

by Kreyòl Enfo
Kreyòl Enfo

Kreyòl Enfo, premye avril 2019 .- Vodouyizan yo tanmen preparasyon pou òganize premye fèstival entènasyonal vodou nan peyi a. Gonayiv se vil ki pral akeyi fèstival sa k ap dewoule 12, 13 ak 14 dawout 2019 la, daprè enfòmasyon yon manm sektè vodou a pataje ak Kreyòl Enfo.

Wougan Enock Géné Genelus eksplike objektif fèstival la se pou fè pwomosyon pou vodou a nan tout mond la epi pèmèt plis tèt kole nan mitan vodouyizan yo.

Ansyen Komisè Gouvènman Gonayiv ki raple enpòtans pratik vodou a nan kilti ayisyèn nan siyale gen plizyè fèstival entènasyonal vodou ki òganize deja nan peyi Benin ki sou kontinan Afriken.

Lameri nan site lendepanpans la deja pran angajman pou bay bourad lajan ak aktivite sa. Rèsponsab biwo lakilti komin nan, Beken Petit Homme, kwè aktivite sa pral ede vann imaj pwatrimwàn kiltirel sa, kote moun k ap pratike vodou Ayiti pa sispann sibi move diskriminasyon.

Docteur Rolguy

0 comments
Newer Posts
Older Posts
kreyolenfo.com. Tout dwa yo rezève.