Author

Johnson DEROSIN

AKTYALITEENFÒMASYON

Aprè li fin pèdi eleksyon an, Flávio Bolsonaro kouri kite Brezil pou rantre Etazini

by Johnson DEROSIN
Johnson DEROSIN

Kreyòl Enfo, 27 oktòb 2026 .- De (2) jou sèlman aprè li fin pèdi eleksyon prezidansyèl yo devan Luiz Inácio Lula da Silva, Senatè Flávio Bolsonaro kouri kite Brezil pou rantre Etazini. Ansyen kandida pou pòs prezidan an kite Brezil ansanm ak madanm li, Fernanda Bolsonaro, epi 2 pitit fi li yo, daprè CNN Brasil.

Ayè lendi a, jij nan Siprèm Tribinal Federal Alexandre de Moraes te pase Flávio Bolsonaro lòd pou remèt paspò li bay Polis Federal epi entèdi l kite Brezil. Daprè enfòmasyon plizyè medya, Flávio Bolsonaro pa remèt paspò a, li gentan travèse fwontyè Ajantin epi pran avyon pou Etazini.

Lajistis nan peyi Brezil ap mennen ankèt sou 2 dosye kote non Flávio Bolsonaro parèt. Nan youn nan dosye yo, otorite jidisyè yo sispèk ansyen kandida a ta ap lave lajan sal atravè yon platfòm ki fè paryaj espòtif. Senatè a nan mitan yon ankèt tou sou finansman film Dark Horse, yon pwodiksyon ki ap rakonte istwa papa l, Jair Bolsonaro.

Washington ta dwe bay Flávio Bolsonaro viza pou li menm ak rès manm fanmi an, daprè enfòmasyon yon otorite amerikèn konfime pou jounal O Globo. Depite Eduardo Bolsonaro, frè Flávio Bolsonaro, te deja abandone manda l pou rete viv Etazini nan lide pou fè « lobby » bò kote administrasyon Trump la.

Kreyòl Enfo

0 comments
OPINYON

Ayiti, malè pandye sou tèt yon jenerasyon ki gen 250 000 timoun ap soufri ak malnitrisyon

by Johnson DEROSIN
Johnson DEROSIN

Kreyòl Enfo, 16 oktòb 2026.- Ayiti ap benyen nan yon larivyè vyolans ki riske efase tout yon jenerasyon. Dènye chif Pwogram Alimantè Mondyal (PAM) ansanm ak Unicef yo montre gen anviwon 250 000 timoun ki genyen ant 6 ak 59 mwa k ap soufri ak malnitrisyon. Pami yo, 94 mil non sèlman genyen pwoblèm lamanjay, men tou ap soufri ak yon maladi grav.

Ajans Nasyonzini yo konstate grangou ak maladi fin manje vyann sou po ti lanj sa yo epi mete lavi yo andanje si pa gen yon entèvansyon imanitè prese prese.

Tritès, kòlè, raj se kèk pami emosyon ki travèse nenpòt sitwayen ki konsève mounite li lè l ap gade soufrans timoun sa yo ki pa mande plis pase yon plat manje. Sonje, katastwòf biyolojik sa se pa rezilta yon fenomèn natirèl moun pa ka epanye, men pito konsekans dirèk gang kriminèl ki anvayi peyi a epi fè dappiyanp sou popilasyon an.

Dram sa ap devlope pandan tout enstitisyon Leta yo fè fayit. Otorite yo pa montre yo gen volonte oubyen solisyon pou rezoud pwoblèm ensekirite a malgre anpil gwo diskou.

Aksyon vyolan gang yo ki pa sispann fè san koule transfòme lavi nan katye okipe yo tankou yon lanfè. Yon sitiyasyon ki pouse plis pase 1.5 milyon moun abandone kay yo, daprè Òganizasyon Nasyonzini.

Wout nasyonal yo ki anba kontwòl gang nan kowalisyon Viv Ansanm se youn nan rezon ki pwovoke plis grangou nan peyi a. Bandi yo pran plezi nan bloke kamyon machandiz, piye magazen epi bloke èd imanitè òganizasyon entènasyonal yo.

Zagoloray yo pouse menm òganizasyon tankou Medsen San Fwontyè sispann aktivite yo nan divès zòn tankou nan matènite Site Solèy. Sa ki lakoz plizyè fanm ansent ak ti bebe viktim paske yo pa jwenn laswenyay.

Ki avni yon peyi ki abandone plizyè santèn milye timoun san dwa pou yo manje, jwe ak etidye?

Kreyòl Enfo

0 comments
AKTYALITEENTÈNASYONAL

Brezil : Lula ak Bolsonaro kòtakòt nan yon eleksyon ki anba menas enjerans ameriken

by Johnson DEROSIN
Johnson DEROSIN

Kreyòl Enfo, 3 oktòb 2026.- Dimanch 4 oktòb sa plis pase 158 milyon brezilyen anrejistre pou al vote nan eleksyon jeneral yo. Sou 12 kandida ki nan kous la pou pòs prezidan, Luiz Inácio Lula da Silva (PT, degoch ) ak Flávio Bolsonaro (PL, ekstrèm dwat) se 2 favori yo. Dènyè sondaj ki pibliye lavèy eleksyon an montre aktyèl prezidan an, Lula, gen 45 % nan entansyon vòt yo, pandan Flávio Bolsonaro, pitit ansyen prezidan Jair Bolsonaro, vini touswit dèyè ak 42%.

Pandan kanpay la, prezidan Lula vann bilan li. Tout sa li reyalize nan tèt peyi Brezil pandan 3 manda. Kandida PT a raple tou batay ak lit li mennen kont inegalite sosyal ak povrete. Lula pwomèt l ap mete 15% sou lajan chak fanmi ki benefisye pwogram sosyal « Bolsa Família » a.

Kandida ekstrèm dwat la sou bò pa l pwomèt l ap konbat krim òganize, defann valè lafanmi, liberalizasyon ekonomi an epi rapwoche Etazini nan dosye jeyopolitik yo.

Enjerans Etazini se youn nan gwo menas ki pandye sou tèt eleksyon Brezil ane sa a. Prezidan ameriken an, Donald Trump, pa janm rate okazyon pou montre l ap soutni kan Bolsonaro a. Nan lane 2025, aprè lajistis te fin kondane ansyen prezidan Jair Bolsonaro pou tantativ Koudeta aprè defèt li nan lane 2022, prezidan ameriken enpoze gwo sanksyon kont pwodwi k ap soti nan peyi Brezil. Eduardo Bolsonaro, ti frè Flávio, abandone yon manda depite pou al viv Etazini nan lide pou fè lobby bò kote administrasyon amerikèn nan.

Jedi premye oktòb pase a gouvènman brezilyen an louvri yon ankèt sou tantativ yo di Etazini ap fè pou rantre bouch nan eleksyon an anfavè kandida ekstrèm dwat la. Yon ankèt ki louvri sitou aprè jounal britanik The Guardian di li gen enfòmasyon Etazini ta envesti yon milyon dola vèt bay kèk òganizasyon nan sosyete sivil la ki opoze ak pouvwa Lula a.

158 milyon elektè yo, pami yo plizyè milye gen rasin yo Ayiti, ap gen pou chwazi yon prezidan ak vis prezidan, yon gouvènè, 2 senatè, yon depite federal epi yon depite pou eta yo oubyen distri federal la.

Johnson DEROSIN

0 comments
ENSEKIRITE

Trajedi : bandi touye yon timoun 5 lane epi jete kadav la sou yon pil fatra

by Johnson DEROSIN
Johnson DEROSIN

Kreyòl Enfo, 17 fevriye 2021.- Olsmina Jean-Méus se non yon ti fi 5 lane bandi ak zam te kidnape semèn pase a. Manman li, Nadège Saint-Hilaire, konfime bandi yo toufe timoun nan ak yon kòd epi jete kadav la sou pil fatra nan zòn Pon Breya, katye Matisan.

Bandi yo te mande 40 mil dola vèt pou libere Olsmina Jean-Méus, daprè manman an ki se yon machann pistach. Yon lajan fanmi ti pitit la pat ka jwenn.

Nan mikwo plizyè medya, Madanm Saint-Hilaire eksplike li  » fè tout mouvman pou m wè si m ta jwenn kòb la pou m bay. Malerezman, nou pat ka jwenn li ». Manman Olsmina ki paka kenbe dlo nan je l presize  » se toufe yo toufe l. Mwen jwenn li ak tout kòd la nan kou li ».

Pou kounye a, kadav ti pitit 5 lane a ap glase nan mòg. Fanmi an bezwen 40 mil goud pou fè lantèman an. Madanm Nadège Saint-Hilaire mande tout sitwayen pote kole pou ede l jwenn mwayen pou bay Olsmina yon dènye ochan.

Asasina ti fi 5 lane sa revòlte divès sitwayen nan sosyete a. Yon krim ki rive nan moman fenomèn kidnaping la pran tout zòn metwopolitèn Pòtoprens la. Otorite yo ki t ap pyafe nan kanaval Pòdepè poko reyaji sou krim sa.

Kreyòl Enfo

0 comments
ENFÒMASYONAKTYALITE

Lanmò : Ernst Jean Joseph, youn nan ewo seleksyon 1974 la, mouri britsoukou

by Johnson DEROSIN
Johnson DEROSIN

Kreyòl Enfo, 14 dawout 2020.- Dèy nan mitan foutbòl ayisyen an. Defansè Ernst jean Joseph moun plis konnen sou non « Tinès » ki te patisipe nan Koupdimond foutbòl 1974 la ak seleksyon nasyonal la mouri, maten vandredi 14 dawout 2020 an, lakay li nan komin Pòtoprens. Daprè enfòmasyon Kreyòl Enfo konfime, Tinès mouri britsoukou, san li pat kouche malad.

Ernst Jean Joseph te jwe nan Asosyasyon Espòtiv Kapwaz (ASC, sig nan lang franse) ak Vyolèt Atletik Klèb (VAC). Li te pote tou koulè ekip « Sting de Chicago », yon klèb dezyèm divizyon nan peyi Etazini.

Foutbolè ayisyen an ki te gen 72 lane rann dènye souf li aprè « yon senp ti malèz », daprè yon pwòch fanmi an. Li eksplike Ernst Jean Joseph te gentan manje epi bay blag ak kèk moun nan lantouray li avan li mouri.

Tinès se te yon pilye nan gwo seleksyon nasyonal foutbòl ki jwe mondyal 1974 la nan peyi Almay. Yon seleksyon ki make listwa foutbòl ayisyen an. Plizyè pèsonalite ak asosyasyon nan sektè espò a reklame fineray nasyonal pou Ernst Jean Joseph yo konsidere kòm pi gran « libero » nan listwa foutbòl ayisyen an.

Kreyòl Enfo

0 comments
JISTISSOSYETE

Pou yon plat manje, yon ti ayisyen pase 12 mwa nan prizon; entènot yo revòlte

by Johnson DEROSIN
Johnson DEROSIN

Kreyòl Enfo, 22 avril 2020 .- Nouvèl yon ti ayisyen ki te pase 12 mwa fèmen nan prizon sèlman paske li te pran yon plat manje kay yon vwazin revòlte sitwayen yo. Sou rezo sosyal yo, entènot yo pwofite raple yon seri desizyon kèk jij konn pran pou libere kidnapè, machann dwòg ak moun ki nan kontrebann san rèspekte lalwa.

« Yo kenbe yon ansyen depite ak yon pakèt dwòg, li fè 11 mwa nan prizon. Yon timoun pran yon asyèt manje, li fè 1 lane ap boule prizon. Se moun yo [otorite] ye? » kòmantè yon sitwayen sou Twitè. Yon lòt ekri  » Ayiti, peyi espesyal! Moun nan prizon pou manje epi vòlè lajan PetwoKaribe a ap banbile ».

Sou Fesbouk yon entènot di « nan peyi ki gen jistis, yo ta dwe arete jij ki te kondane timoun nan ». Li ajoute  » si se te yon gwo zotobre, yo t ap di l ale pa fè sa ankò menm jan ak Sonson Lafamilia ».

Tribinal pou timoun (TPE, sig nan lang franse) nan tèt kole ak pakè Pòtoprens libere tibway la, ayè mèkredi a (22), nan kad pwogram espesyal pou libere kèk prizonye pandan epidemi nouvo kowonaviris la.

Kreyòl Enfo

0 comments
KILTISOSYETE

« Soup libète », yon inisyativ pou remanbre tradisyon nou

by Johnson DEROSIN
Johnson DEROSIN

Pòtoprens, 21 desanm 2018.- Pou make 214 lane depi Ayiti pran lendepandans li, Fondasyon STO lanse « Soup libète  » pou premye janvye 2019 k ap vini la a. Inisyativ sa vize rebay tradisyon bwè soup chak premye janvye a veritab sans li genyen nan listwa pèp ayisyen an, daprè responsab kominikasyon Fondasyon an, Cliff Coulange.

Fondasyon STO ki jwenn bourad Fondasyon 5×4 prevwa distribiye plat « Soup libète a » nan plis pase 400 sant nan tout peyi a.

Responsab kominikasyon an presize inisyativ « Soup libète  » premye janvye k ap vini la a pa gen okenn objektif politik. Se sitou lokazyon pou montre enpòtans pou tout aktè politik ak sosyete sivil la mete tèt yo ansanm tankou zansèt nou yo te fè pou kase kòd lèsklavaj nan kòmansman 19e syèk la.

Cliff Coulange wè nan inisyativ sa tou yon mwayen pou ankouraje pwodiksyon nasyonal la.

Fondasyon STO ap milite nan domèn edikasyon sitwayen. Li chita kò l nan lekòl frè St-Louis de Gonzague yo. Fondasyon 5×4, sou bò pal, ap travay nan zafè anviwònman. Gen 53 lekòl ki manm Fondasyon an ki vle plante 20 milyon pye bwa pandan 4 lane.

Kreyòl Enfo

0 comments
kreyolenfo.com. Tout dwa yo rezève.