Kreyòl Enfo, 15 dawout 2020.- Dèy nan mitan foutbòl ayisyen an. Defansè Ernst jean Joseph moun plis konnen sou non « Tinès » ki te patisipe nan Koupdimond foutbòl 1974 la ak seleksyon nasyonal la mouri, maten vandredi 14 dawout 2020 an, lakay li nan komin Pòtoprens. Daprè enfòmasyon Kreyòl Enfo konfime, Tinès mouri britsoukou, san li pat kouche malad.
Ernst Jean Joseph te jwe nan Asosyasyon Espòtiv Kapwaz (ASC, sig nan lang franse) ak Vyolèt Atletik Klèb (VAC). Li te pote tou koulè ekip « Sting de Chicago », yon klèb dezyèm divizyon nan peyi Etazini.
Foutbolè ayisyen an ki te gen 72 lane rann dènye souf li aprè « yon senp ti malèz », daprè yon pwòch fanmi an. Li eksplike Ernst Jean Joseph te gentan manje epi bay blag ak kèk moun nan lantouray li avan li mouri.
Tinès se te yon pilye nan gwo seleksyon nasyonal foutbòl ki jwe mondyal 1974 la nan peyi Almay. Yon seleksyon ki make listwa foutbòl ayisyen an. Plizyè pèsonalite ak asosyasyon nan sektè espò a reklame fineray nasyonal pou Ernst Jean Joseph yo konsidere kòm pi gran « libero » nan listwa foutbòl ayisyen an.
Kreyòl Enfo