Kreyòl Enfo, 28 dawout 2020.- Bandi ak zam otorite yo poko idantifye touye anba bal, aswè vandredi 28 dawout la, Mèt Monferrier Dorval lakay li nan zòn Pèleren 5, komin Petyonvil. Yon pwòch avoka a ki konfime enfòmasyon an pou redaksyon Kreyòl Enfo presize Mèt Dorval resevwa plizyè katouch.
Imaj ki deja ap fè laviwonn rezo sosyal yo montre kadav Mèt Monferrier Dorval ap benyen nan san li atè tou pre yon machin. 2 pòt devan machin nan rete tou louvri. Batonye lòd avoka Pòtoprens yo sanble te nan machin nan pandan atak la.
Mèt Monferrier Dorval se youn nan konstitisyonalis moun plis rèspekte nan sosyete a. Li toujou pataje opinyon li sou anpil gwo dosye k ap fè aktyalite nan peyi a.
Yon lòt fwa ankò, machin ensekirite wete lavi youn nan gwo entèlektyèl ki te chwazi rete viv nan peyi a.
Kreyòl Enfo