Category:

JISTIS

AKTYALITEJISTIS

Mèt Joseph Mecène Jean-Louis, ansyen dwayen Lakou kasasyon, mouri nan yon lopital Gonayiv

by Kreyòl Enfo
Kreyòl Enfo

Kreyòl Enfo, 7 oktòb 2026.- Ansyen dwayen Lakou kasasyon an, Mèt Joseph Mecène Jean-Louis, mouri nan lanwit madi 6 pou louvri mèkredi 7 oktòb la, daprè sa youn nan pitit li anonse sou Fesbouk. Jij la mouri nan yon lopital Gonayiv akoz li te gen pwoblèm pou respire.

Mèt Joseph Mecène Jean-Louis fè tout karyè li nan sistèm jidisyè a ak inivèsitè ayisyen an. Li te avoka nan bawo Gonayiv, sibtiti komisè gouvènman epi jij . Li te rantre nan Lakou kasasyon nan lane 2011 pou jouk rive mwa fevriye 2021 . Mèt Mecène Jean-Louis te anseye nan Lekòl dwa ak syans ekonomik Gonayiv la, yon antite li te dirije tou pandan plizyè lane.

Nan mwa fevriye 2021, yon pati nan opozisyon politik nan epòk la te chwazi Mèt Joseph Mecène Jean-Louis pou dirije yon tranzisyon akoz dezakò sou dire manda prezidan Jovenel Moise. Yon demach ki pat abouti. Prezidan Jovenel Moise ki te denonse jij la li di k ap vòlè tit te siyen yon arete prezidansyèl menm 8 fevriye a epi voye Joseph Mecène Jean-Louis nan retrèt.

Mèt Jean-Louis fèt nan vil Desalin, Latibonit. Li te gen 77 lane.

Kreyòl Enfo 

0 comments
AKTYALITEJISTIS

Baradè : plizyè endividi anba kòd nan dosye asasina ansyen depite Dupner Clément an

by Kreyòl Enfo
Kreyòl Enfo

Kreyòl Enfo, 5 oktòb 2026.- Otorite yo nan depatman Nip la fouke, pandan wikenn nan, plizyè endividi ki ta enplike nan lanmò ansyen depite sikonskripsyon Baradè ak Gran Boukan an, Dupner Clément. Gen de (2) pami sispèk lapolis arete yo ki t ap travay ak depite a, daprè enfòmasyon yo.

Yon abitan nan zòn nan ki pale ak redakayon Kreyòl Enfo eksplike depite Dupner Clément, 49e lejislati, te gentan revoke 2 sispèk ki anba men lapolis yo. Moun nan zòn nan plis konnen endividi sa yo sou non « Semalè » ak « Leandre » . Sitwayen an di depite a te revoke endividi sa yo paske yo ta vòlè lajan ak lòt bagay ki te gen nan kay la.

Yo te dekouvri kadav ansyen depite Dupner Clément 24 septanm pase a, nan lakou lakay li. Kadav palmantè a te gen san nan bouch ak atè kote li te alonje a.

Otorite nan depatman Nip la pwomèt pou fè limyè sou asasina Dupner Clément ki t ap prepare l pou poze kandida nan eleksyon k ap vini yo.

Kreyòl Enfo

0 comments
ENFÒMASYONJISTIS

IJAN : 5 polisye ki t ap siveye kay Mèt Monferrier Dorval yo fèmen penitansye ak tout inifòm

by Kreyòl Enfo
Kreyòl Enfo

Kreyòl Enfo, 11 septanm 2020.- Chèf pakè Pòtoprens la, Mèt Ducarmel Gabriel, pase lòd, jodi vandredi a (11), pou fèmen nan penitansye nasyonal senk (5) polisye ki t ap siveye kay batonye Monferrier Dorval, Peleren 5, aprè asasina 28 dawout pase a.

Malgre plizyè tantativ redaksyon Kreyòl Enfo (KE), pakè Pòtoprens poko bay twòp detay sou rezon ki pouse Mèt Ducarmel Gabriel voye polisye yo fèmen nan penitansye nasyonal.

Plizyè polisye denonse desizyon komisè gouvènman Pòtoprens la yo di pa respèkte enstitisyon lapolis la. Lidè politik nan opozisyon an ki deja reyaji sou dosye kwè se yon estrateji pouvwa a ap itilize pou kache idantite prensipal moun ki komèt krim nan.

Senk (5) polisye komisè gouvènman an fèmen nan prizon yo se Dodley Pierre, Mackenson Cléus, Mackenson Prévil, Angou M. Orcel ak Sénèque Jean Louis.

Kreyòl Enfo

0 comments
JISTISSOSYETE

Pou yon plat manje, yon ti ayisyen pase 12 mwa nan prizon; entènot yo revòlte

by Johnson DEROSIN
Johnson DEROSIN

Kreyòl Enfo, 22 avril 2020 .- Nouvèl yon ti ayisyen ki te pase 12 mwa fèmen nan prizon sèlman paske li te pran yon plat manje kay yon vwazin revòlte sitwayen yo. Sou rezo sosyal yo, entènot yo pwofite raple yon seri desizyon kèk jij konn pran pou libere kidnapè, machann dwòg ak moun ki nan kontrebann san rèspekte lalwa.

« Yo kenbe yon ansyen depite ak yon pakèt dwòg, li fè 11 mwa nan prizon. Yon timoun pran yon asyèt manje, li fè 1 lane ap boule prizon. Se moun yo [otorite] ye? » kòmantè yon sitwayen sou Twitè. Yon lòt ekri  » Ayiti, peyi espesyal! Moun nan prizon pou manje epi vòlè lajan PetwoKaribe a ap banbile ».

Sou Fesbouk yon entènot di « nan peyi ki gen jistis, yo ta dwe arete jij ki te kondane timoun nan ». Li ajoute  » si se te yon gwo zotobre, yo t ap di l ale pa fè sa ankò menm jan ak Sonson Lafamilia ».

Tribinal pou timoun (TPE, sig nan lang franse) nan tèt kole ak pakè Pòtoprens libere tibway la, ayè mèkredi a (22), nan kad pwogram espesyal pou libere kèk prizonye pandan epidemi nouvo kowonaviris la.

Kreyòl Enfo

0 comments
kreyolenfo.com. Tout dwa yo rezève.