ENSEKIRITE

Kreyòl Enfo, 25 fevriye 2021 .- Pou pi piti sèt (7) moun mouri ak plizyè lòt blese pandan yon deblozay nan prizon sivil Kwadèboukè a, jodi jedi 25 fevriye a, kote yon dividal prizonye rive sove, daprè sa plizyè jounalis konstate. Plis pase 6 èd tan aprè, otorite yo poko prezante okenn bilan ofisyèl sou sitiyasyon an.

Jounalis ak abitan nan komin nan te remake plizyè gwoup jèn gason k ap kouri ak gwo zam fann fwa nan men yo. Divès inite nan Polis Nasyonal Ayiti a (PNH, sig nan lang franse) te deplwaye nan rejyon an aprè evènman an. Fòs lòd yo deja mete lapat sou plizyè nan endividi sa yo ki te sove kite prizon an.

Daprè premye enfòmasyon yo, Arnel Joseph ta pami prizonye ki sove yo. Arnel Joseph se yon ansyen chèf gang ki t ap fè lalwa nan zòn Vilajdedye. Nan kòmansman ane a li te fè anpil gwo deklarasyon devan lajistis sou bon relasyon li ta genyen ak divès gwo zotobre nan pouvwa a.

Ansyen depite Arnel Belizaire pami moun ki fèmen nan prizon sivil Kwadèboukè a.

Kreyòl Enfo

Kreyòl Enfo, 22 oktòb 2020.- Bandi ak zam kidnape, aswè mèkredi 21 oktòb la, ansyen atakan seleksyon nasyonal foutbòl la Johnny Descolines nan zòn Dèlma 33. Se ansyen konpayèl li nan seleksyon an Ernso Laurence ki konfime enfòmasyon an pou redaksyon Kreyòl Enfo.

Bandi ki kidnape Johnny Descolines yo deja kontakte fanmi an epi mande  » anpil lajan », daprè Ernso Laurence ki rèsponsab pak Sent Terèz, nan komin Petyonvil.

Johnny Descolines se grenadye ki te konn briye nan seleksyon nasyonal la. Li te pote koulè ekip vyolèt la pandan plizyè lane.

Kreyòl Enfo

Kreyòl Enfo, 28 dawout 2020.- Bandi ak zam otorite yo poko idantifye touye anba bal, aswè vandredi 28 dawout la, Mèt Monferrier Dorval lakay li nan zòn Pèleren 5, komin Petyonvil. Yon pwòch avoka a ki konfime enfòmasyon an pou redaksyon Kreyòl Enfo presize Mèt Dorval resevwa plizyè katouch.

Imaj ki deja ap fè laviwonn rezo sosyal yo montre kadav Mèt Monferrier Dorval ap benyen nan san li atè a tou pre yon machin. 2 pòt devan machin nan rete tou louvri. Batonye lòd avoka Pòtoprens yo sanble te nan machin nan pandan atak la.

Mèt Monferrier Dorval se youn nan konstitisyonalis moun plis rèspekte nan sosyete a. Li toujou pataje opinyon li sou anpil gwo dosye politik k ap fè deba nan sosyete a.

Yon lòt fwa ankò, machin ensekirite a wete lavi youn nan gwo entèlektyèl ki t ap sèvi peyi a.

Kreyòl Enfo

Kreyòl Enfo, 27 jen 2020.- Endividi otorite yo poko idantifye simen katouch, nan lanwit vandredi pou louvri samdi 27 jen an, sou yon jèn animatè mizik ki gen non atis « DJ Kabwa » nan vil Gonayiv, depatman Latibonit.a

Bandi yo wete lavi atis la pandan li t ap soti nan yon pwogram ki rele « Atè Plat », daprè enfòmasyon yon pwòch viktim nan pataje ak kolaboratè Kreyòl Enfo nan site lendepandans la.

« DJ Kabwa » moun Gonayiv prezante tankou yon jèn ki boure talan ta yon pwòch senatè Youri Latortue. Fanmi atis la mande otorite yo fè limyè sou zam asasinay sa epi pini koupab yo.

Fenomèn ensekirite a pa sispann ogmante nan site lendepandans la. Malgre anpil dispozisyon otorite nan lapolis ak lajistis di yo pran pou kwape bandi, sitwayen yo kontinye ap viktim chak jou pi plis.

Kreyòl Enfo

Kreyòl Enfo, 26 jen 2020.- Sèt (7) moun mouri ak plizyè lòt soti blese, aprè midi jedi 26 jen an, pandan yon fiziyad nan komin Gantye, depatman Lwès. Dram sa pase nan sant komin nan tou pre lokal komisarya, konplèks administratif ak sant sante a.

Yon temwen ki pale ak redaksyon Kreyòl Enfo (KE) nan telefòn eksplike《se yon endividi ki t ap tante vole yon machin bò 2zè konsa. Mèt machin nan ki wè sa kouri pou anpeche vòlè a pati ak machin nan.》Malerezman, 《endividi sa sezi yon zam ki te nan machin nan epi tonbe simen katouch nan tout direksyon. 4 moun mouri lapoula, 2 lòt ki te blese byen grav pèdi lavi yo nan chimen lopital》, toujou daprè temwen an.

Aprè fiziyad la, popilasyon an mete lapat sou prezime kriminèl la ki te gentan nan men lapolis epi touye l anba kout wòch ak kout manchèt. Yon rèsponsab lapolis nan komin Gantye di, daprè temwayaj abitan nan zòn nan, endividi ki komèt krim nan ta yon depòte ki gen pwoblèm mantal.

Abitan nan komin Gantye ak zòn ki viwonnen l yo sou gwo chòk aprè fiziyad sa. Pandan tout jounen vandredi a, dram nan te nan mitan prèske tout diskisyon sitwayen yo.

Kreyòl Enfo