ENSEKIRITE

Kreyòl Enfo, 3 avril 2020 .- Pandan tout moun konsantre sou pandemi nouvo kowonaviris la, plizyè jenn fanm pran plezi nan fouye moun anba lavil la, daprè sa yon kolaboratè Kreyòl Enfo konstate.

Yon machanm k ap pwonmennen rad bò mache tèt bèf eksplike  » mèdam yo ap mache byen abiye epi lè yo rive bò kote w yo rale kouto epi mande w tout lajan ki nan men w  » Machanm rad la di genyen nan jenn fanm sa yo ki itilize « jilèt ak pik  » tou pou komèt zak yo.

» Yo pa jwazi moun pou yo fouye. Ni machann, ni moun ki vin achte pase anba men mèdanm sa yo », pawòl machann rad la ki kwè se bandi ki kontwole zòn Lasalin ak Pòtay Sen Jozèf ki voye jenn fanm sa yo dechèpiye moun.

Plizyè ti machann anba lavil la denonse konpòtman polisye ki nan komisarya Sen Jozèf la, tou pre mache a, yo di ki pa fè anyen pou mete bout nan aksyon bandi yo.

Kreyòl Enfo

Kreyòl Enfo, 22 jiyè 2019.- Sonine Mathurin pèdi lavi l, ayè dimanch la (21 jiyè), aprè li te fin resevwa plizyè kout kouto anba men mari l Sanès Guerrier nan lokalite Koray, 2e seksyon kominal Tigwav (Lwès).

Viktim nan mouri kite 3 pitit, daprè youn nan jij depè komin nan, Délicio Vernevil, ki te fè konsta legal yo. Majistra a sispèk se jalouzi ki ta lakoz Sanès Guerrier komèt krim nan.

Aprè zak la, kriminèl la gentan chape poul li pou fòs lòd yo pa arete l.

Kantite moun k ap viktim akoz pwoblèm jalouzi sanble ap ogmante nan peyi a. Semèn pase a, yon kad nan Ministè jenès espò ak aksyon sivik (MJSAC) te touye madanm li ak 3 bal epi sove kite kay la.

Kreyòl Enfo

Pòtoprens, 16 janvye 2019 .- Dram nan Lopital Jeneral! Yon gwoup endividi rantre pran yon malad anndan sal ijans Lopital Inivèsite Leta Ayiti a (HUEH, sig nan lang franse), nan mitan lanwit madi pou louvri jodi mèkredi a (16), epi touye l anba bal nan lantouray enstitisyon an.

Enfòmasyon yon enfimyè ki pa vle non l site pataje ak Kreyòl Enfo (KE) presize «viktim nan te resevwa plizyè katouch avan yo te mennen l lopital la. Kèk tan aprè, bò minwi konsa, pandan n ap fè mannèv pou bay laswenyay, plizyè jèn gason rantre lopital la ak gwo zam, fòse nou bay jèn gason ki blese a epi yo soti avè l.»

Yon machanm ki vanm bwason devan lopital la eksplike « aprè nèg ak zam yo fin soti nan lopital la ak moun ki blese a, m tande plizyè bal tire pi devan. Aprè, se nouvèl yon kadav atè a ki rive jwenn nou »

Daprè enfòmasyon Vant bèf info (VBI), gwoup endividi ki komèt zak la te fè kwè se pou Lapolis y ap travay nan moman yo te rantre pran viktim nan lopital la.

Malgre plizyè tantativ, Kreyòl Enfo pa rive jwenn okenn enfòmasyon ofisyèl sou ensidan ni nan administrasyon Lopital Inivèsite Leta Ayiti ni bò kote Lapolis.

Kreyòl Enfo