Masak Lasalin : 64 moun mouri pami yo 16 fanm ak 6 timoun, daprè RNDDH

Pòtoprens, lendi 3 desanm 2018 .-Rezo nasyonal k ap defann dwa moun yo (RNDDH, sig nan lang franse) pibliye, pandan wikenn nan, rapò ankèt sou masak bandi ak zam te fè nan katye Lasalin nan kòmansman mwa novanm nan.

Premye novanm 2018, gen senk (5) moun ki pèdi lavil yo epi nèf (9) lòt blese anba bal, daprè enfòmasyon ki nan rapò RNDDH la.

13 novamm 2018, Rezo a rapòte bandi yo masakre senkantnèf (59) moun epi blese senk (5) lòt. 2 sitwayen disparèt depi menm dat la.

Pami moun bandi asasinen 13 novamm yo, Rezo nasyonal k ap defann dwa moun yo konte 16 fanm ak 6 timoun pami yo 2 ti bebe 3 zan.

Zagoloray yo piye epi simen katouch sou anviwon 150 kay nan ki zòn Lasalin, Ri Dèmang ak Ri Dikè. Yo mete dife tou nan plizyè kay Nan Chabon, toujou daprè sa ki nan rapò RNDDH la.

Òganizasyon dwa moun nan siyale masak Lasalin nan se evènman kriminèl ki touye plis moun nan peyi a aprè masak Jan Rabèl ( Nòdwès) nan lane 1986 kote 139 moun te pèdi lavi yo.

Rezo nasyonal k ap defann dwa moun yo di li jwenn enfòmasyon ki montre gen kòkòday nan mitan bandi ki komèt krim yo ak gwo otorite nan peyi a.

Responsab rezo a kritike administrasyon Moise -Céant a li estime ki pa bay dosye sa enpòtans. Yo konseye lajistis mennen bon jan ankèt epi kondane tout koupab yo.

Kreyòl Enfo