Category:

AKTYALITE

AKTYALITE

Bandi touye Evelyne Sincère, elèv yo te kidnape 29 oktòb pase a, epi jete kadav la sou yon pil fatra

by Kreyòl Enfo
Kreyòl Enfo

Kreyòl Enfo, premye novanm 2020.- Sitwayen nan zòn Dèlma 24 dekouvri, maten dimanch premye novanm nan, kadav Evelyne Sincère bandi te kidnape 29 oktòb pase a sou yon gwo pil fatra. Viktim nan ki te fenk fin konpoze nan egzamen ofisyèl pou klas filo te lekòl nan lise Jacques Roumain, Matisan.

Yon gran sè Evelyne Sincère ki idantifye kadav la presize bandi yo te reklame 100 000 dola vèt pou libere l. Aprè anpil negosyasyon, kidnapè yo te pwomèt y ap aksèpte 15 000 dola nan men fanmi an. Men, maten dimanch la, ak anpil dezolasyon yo dekouvri kadav jèn fi a sou pil fatra.

Kidnaping epi asasinay Evelyne Sincère, 21 lane, revòlte anpil sitwayen ki pa kache endiyasyon yo sou rezo sosyal yo. Entènot yo kòmanse mobilize pou mande tout sosyete a manifeste kont ensekirite a epi fòse otorite yo pran rèsponsabilite yo.

Kreyòl Enfo

0 comments
AKTYALITEENFÒMASYON

IJAN : Francois Anick Joseph, ansyen senatè Latibonit, mouri britsoukou nan peyi Kanada

by Kreyòl Enfo
Kreyòl Enfo

Kreyòl Enfo, 27 oktòb 2020.- Ansyen senatè Latibonit la, François Anick Joseph, mouri aprè midi madi 27 oktòb la nan peyi Kanada. Daprè enfòmasyon ki rive jwenn redaksyon Kreyòl Enfo (KE), ansyen minis enteryè ak kolektivite tèritoryal yo mouri britsoukou aprè yon kriz kè.

François Anick Joseph te senatè nan depatman Latibonit anba chapo pati Òganizasyon Pèp k ap Lite (OPL). Li te okipe pòs minis enteryè pandan pouvwa tranzisyon Jocelerme Privert t ap dirije a.

Senatè François Anick Joseph, 58 lane, te pwofesè sosyoloji nan plizyè fakilte nan peyi a.

Kreyòl Enfo

0 comments
AKTYALITEENSEKIRITE

Ensekirite : pou yon telefòn, bandi touye yon tifi 14 lane nan vil Okay

by Kreyòl Enfo
Kreyòl Enfo

Kreyòl Enfo, 22 oktòb 2020.- Mardochée Wagnac, yon jèn tifi 14 lane, pèdi lavi l anba bal bandi sou motosiklèt aswè mekrèdi 21 oktòb la nan zòn Vènè, yon katye nan vil Okay, depatman Sud. Enfòmasyon ki rive jwenn redaksyon Kreyòl Enfo (KE) konfime bandi yo kòmèt krim nan paske viktim nan te refize bay yon telefòn ki te nan men l.

Lapolis nan depatman Sid la poko fè okenn arèstasyon aprè krim sa ki revòlte sitwayen nan tout rejyon an. Anpil sitwayen egzije otorite yo mete lapat sou endividi ki kòmèt zak la epi jije yo jan lalwa mande sa.

Yon pwòch Mardochée ki pat ka gen kenbe dlo nan je l siyale « Ayiti pat janm rive nan yon sitiyasyon malouk konsa. Vagabon wete lavi yon pou yon vye telefòn. Se pa posib pou Leta remèt peyi a bay bandi. »

Menm jan zòn metwopolitèn Pòtoprens la, bandi ak zam ap taye banda nan depatman Sid la. Pandan dènye jou sa yo, zagoloray pa sispann vole, fè kadejak sou fanm epi touye sitwayen nan divès vil nan rejyon sid la.

Kreyòl Enfo

0 comments
AKTYALITEUncategorized

Grégory Saint-Hilaire, etidyan nan Lekòl Nòmal Siperyè, mouri anba bal yon ajan Inite Sekirite Palè Nasyonal

by Kreyòl Enfo
Kreyòl Enfo

Kreyòl Enfo, 3 oktòb 2020.- Yon etidyan nan Lekòl Nòmal Siperyè (ENS, sig nan lang franse) pwomosyon 2013-2017 mouri anba bal, vandredi 2 oktòb la, aprè li te fin resevwa yon bal nan do anndan lokal fakilte a. Viktim nan ki rele Grégory Saint-Hilaire rann dènye souf li lopital Bernard Mevs.

Etidyan ki te prezan nan lokal ENS nan moman ensidan an lonje dwèt sou ajan Inite Sekirite Palè Nasyonal (USGN, sig nan lang franse) kòm prensipal rèsponsab krim nan. Youn nan yo eksplike se pandan yo t ap revandike dwa yo nan lokal fakilte a sou yon pwotokòl ministè edikasyon nasyonal ak lekòl nòmal te siyen pou pèmèt etidyan k ap fini fè estaj epi nome yo, polisye debake epi simen katouch ak gaz lakrimojèn sou lokal la.

Plizyè nan etidyan yo ki pat ka kenbe dlo nan je regrèt aprè « kanmarad Grégory fin pran bal la, polisye yo te kontinye ap veye deyò a pou asasinen nenpòt etidyan ki ta soti pou mennen l pran laswenyay ». Youn nan yo ki pale ak redaksyon Kreyòl Enfo (KE) konfime se aprè plis pase twa èd tan yo te rive kouri ak viktim nan lopital jeneral. malerezman, pat gen okenn doktè pou ba li laswenyay.

Nan kamyonèt, etidyan yo te kouri ak Grégory Saint-Hilaire nan lopital Bernard Mevs. Jèn pwofesè a ki te gentan pase plizyè èd tan ap bay san rann dènye souf li nan lakou lopital la.

Grégory Saint-Hilaire se yon jèn pwofesyonèl ki te konn patisipe nan tout mouvman pou denonse move konpòtman otorite yo epi mande bon jan ankadreman pou jèn ki soti nan Inivèsite Leta Ayisyen an (ILA). Aprè Lekòl nòmal, Grégory Saint-Hilaire te nan dezyèm ane tou nan fakilte dwa ak syans ekonomik.

Kreyòl Enfo

0 comments
AKTYALITEPOLITIK

Ayiti-politik : yon minis Tèt Kale pwovoke gwo latwoublay nan Lakoudèkont

by Kreyòl Enfo
Kreyòl Enfo

Kreyòl Enfo, 23 septanm 2020.– Gwo eskonbrit pete, aprè midi mèkredi 23 septanm 2020 an, nan lokal Lakoudèkont ak kontansye administratif (CSC/CA, sig nan lang franse). Daprè enfòmasyon prezidan enstitisyon an, Rogavil Boiguéné, konfime pou redaksyon Kreyòl Enfo (KE), deblozay sa pete aprè minis travo piblik, transpò ak kominikasyon an, Joiseus Nader, te debake britsoukou nan lokal la.

Prezidan CSC/CA a denonse minis la li di ki debake ak yon dividal nèg ak gwo zam fanm fwa ansanm ak plizyè jounalis. Mèt Boiguéné souliye minis Nader rantre nan tout espas sansib ki genyen nan lokal enstitisyon an kote anplwaye yo ap travay sou anpil dosye kòripsyon tankou PetwoKaribe.

Rogavil Boiguéné te pase lòd pou fèmen tout baryè epi egzije prezans yon jij depè nan espas la pou fè konsta legal yo avan li pèmèt minis la kite lokal la. Chèf gouvènman an, Joseph Jouthe, te oblije ale nan lokal CSC/CA a pou pèmèt Joiseus Nader soti nan lokal la ansanm ak moun ki te akonpaye l yo.

Gwo bouch louvri te deja egziste nan mitan CSC/CA ak manm pouvwa Egzekitif la aprè jij yo te refize bay avi favorab ak yon seri akò Leta ayisyen ta pral siyen ak konpayi « General Electric » pou pwodwi kouran.

Kreyòl Enfo

0 comments
AKTYALITEENFÒMASYON

Asasina Monferrier Dorval : fanmi viktim nan chwazi dat ak lokal pou chante lantèman an

by Kreyòl Enfo
Kreyòl Enfo

Kreyòl Enfo, 8 septanm 2020.- Prèske 2 semèn aprè bandi ak zam te fin asasine batonye lòd avoka Pòtoprens yo, Mèt Monferrier Dorval, otorite yo remèt kadav la bay fanmi viktim nan.

Daprè enfòmasyon redaksyon Kreyòl Enfo (KE) konfime, lantèman Mèt Monferrier Dorval ap chante nan legliz Sen Pyè, komin Petyonvil, jedi 18 septanm k ap vini la a. Anpil mobilizasyon ap fèt nan mitan divès sektè nan peyi a pou bay yon dènye ochan ak batonye a ki te konn fè kou tou nan plizyè Inivèsite.

Pandan planifikasyon ap fèt pou lantèman konstitisyonalis la, gwo mouvman pwotestasyon ap rapouswiv nan kapital la ak divès lòt vil pou denonse zak asasinay sa epi mande Leta frennen fenomèn ensekirite a.

Komisè gouvènman Pòtoprens la, Mèt Durcamel Gabriel, envite plizyè avoka ansanm ak sekretè prive Mèt Dorval nan kad ankèt pakè deja louvri pou fè limyè sou krim nan.

Kreyòl Enfo

0 comments
ENFÒMASYONAKTYALITE

Lanmò : Ernst Jean Joseph, youn nan ewo seleksyon 1974 la, mouri britsoukou

by Johnson DEROSIN
Johnson DEROSIN

Kreyòl Enfo, 14 dawout 2020.- Dèy nan mitan foutbòl ayisyen an. Defansè Ernst jean Joseph moun plis konnen sou non « Tinès » ki te patisipe nan Koupdimond foutbòl 1974 la ak seleksyon nasyonal la mouri, maten vandredi 14 dawout 2020 an, lakay li nan komin Pòtoprens. Daprè enfòmasyon Kreyòl Enfo konfime, Tinès mouri britsoukou, san li pat kouche malad.

Ernst Jean Joseph te jwe nan Asosyasyon Espòtiv Kapwaz (ASC, sig nan lang franse) ak Vyolèt Atletik Klèb (VAC). Li te pote tou koulè ekip « Sting de Chicago », yon klèb dezyèm divizyon nan peyi Etazini.

Foutbolè ayisyen an ki te gen 72 lane rann dènye souf li aprè « yon senp ti malèz », daprè yon pwòch fanmi an. Li eksplike Ernst Jean Joseph te gentan manje epi bay blag ak kèk moun nan lantouray li avan li mouri.

Tinès se te yon pilye nan gwo seleksyon nasyonal foutbòl ki jwe mondyal 1974 la nan peyi Almay. Yon seleksyon ki make listwa foutbòl ayisyen an. Plizyè pèsonalite ak asosyasyon nan sektè espò a reklame fineray nasyonal pou Ernst Jean Joseph yo konsidere kòm pi gran « libero » nan listwa foutbòl ayisyen an.

Kreyòl Enfo

0 comments
ENFÒMASYONAKTYALITE

Lanmò : Konpè Filo, jounalis nan Radyo ak Televizyon Ginen, mouri jodi vandredi a

by Kreyòl Enfo
Kreyòl Enfo

Kreyòl Enfo, 31 jiyè 2020 .- Jounalis Anthony Pascal moun plis konnen sou non Konpè Filo mouri jodi vandredi 31 jiyè a, daprè enfòmasyon jounalis Lunie Joseph pataje sou Twitè. Poko gen twòp detay sou sikonstans lanmò Konpè Filo ki te konn anime emisyon Kalfou sou Radyo ak Televizyon Ginen (RTG).

Anthony Pascal (Konpè Filo) se youn nan jounalis moun te plis rèspekte nan peyi a. Li te sibi gwo zak maspinay pandan peryòd diktati boutdi François ak Jean-Claude Duvalier a. Konpè Filo te oblije ale nan egzil nan lane 1985.

Tout ekip Kreyòl Enfo a wete chapo pou swete Konpè Filo bon travèse.

Kreyòl Enfo

0 comments
ENSEKIRITEAKTYALITE

Okap : bandi ak zam mete dife nan plis pase 12 kay nan zòn Shada 2

by Kreyòl Enfo
Kreyòl Enfo

Kreyòl Enfo, 11 jen 2020.- Plis pase yon douzèn kay pase anba flanm dife, jedi 11 jen an, nan zòn Shada 2 , yon katye nan vil Okap, depatman Nò. Kolaboratè Kreyòl Enfo (KE) nan dezyèm vil peyi a konfime se bandi ak zam ki mete dife nan kay sa yo.

Daprè temwayaj pwopriyetè youn nan kay ki boule yo, se bandi nan katye Nan Bannann ki anvayi Shada 2 epi mete dife nan kay yo. Sitwayen an di bandi Nan Bannann yo ta sèvi ak enfòmansyon lapolis nan vil Okap te bay pandan jounen pou komèt zak sa. Pandan yon konferans pou laprès, rèsponsab polis nan depatman Nò a te anonse yo rive touye yon bandi epi arete 16 lòt nan katye Shada 2.

»   Soti janvye pou rive mwa mas, 13 polisye mouri anba bal bandi

Anpil kout zam otomatik ap chante nan divès katye vil Okap pandan tout jounen an. Sa ki te bay anpil difikilte pou sèvis ponpye rantre Shada 2 al tenyen dife a.

Depi ayè mèkredi a, gwo eskonbrit pete nan vil Okap kote 2 gwoup gang ap twoke kòn yo. Pou pi piti 3 moun gentan mouri pami yo yon ajan UDMO.

0 comments
ENFÒMASYONAKTYALITE

Dram : 15 timoun mouri boule nan ofelina yon legliz Kenskòf

by Kreyòl Enfo
Kreyòl Enfo

Kreyòl Enfo, 14 fevriye 2020 .- Yon gwo dife eklate nan ofelina legliz « Compréhension de la Bible » nan zòn Fèmat, komin Kenskòf, nan lanwit jedi 13 fevriye 2020 an. Pi piti 15 tou pi piti 15 timoun pèdi lavi yo akoz konsekans dife sa.

Yon ajan pwoteksyon sivil ki te vizite lokal dram nan jodi a konfime plizyè nan timoun yo mouri akoz pwoblèm laswenyay. Li presize 2 nan timoun yo mouri kangannen nan lokal ofelina a, sepandan lòt 13 yo mouri nan yon lopital nan kapital la.

Ofelina legliz « Compréhension de la Bible » la pat gen pèmisyon pou l fonksyone depi 2013, daprè yon rèsponsab nan Enstiti byenèt sosyal ak rechèch (IBERS). Li regrèt se sèlman 35 pami 754 ofelina ki genyen nan peyi ki gen otorizasyon pou fonksyone.

Direktris IBERS la, Arielle Vildouin, ki denonse move kondisyon ofelina legliz « Compréhension de la Bible » la presize te gen 66 timoun nan ofelina a, men se sèlman 3 granmoun ki te akonpaye timoun yo nan moman dram nan.

Enfòmasyon yo fè kwè se balèn ki te limen nan lokal ki ta lakoz dife sa eklate. Toutfwa, otorite yo anonse yo deja louvri yon ankèt pou fè limyè sou dram sa.

Kreyòl Enfo

0 comments
Newer Posts
Older Posts
kreyolenfo.com. Tout dwa yo rezève.