AKTYALITE

Kreyòl Enfo, 22 novanm 2021.- Òganizasyon Sosyal Ede Timoun ( OSET) kònen lanbi nan zòrèy otorite yo ak rès sosyete a sou sitiyasyon difisil timoun yo ap travèse nan rejyon Sid peyi a sitou depi aprè tranbleman tè 14 dawout pase a. Òganizasyon an k ap akonpaye timoun nan depatman Sid la sitou nan komin Aken depi plizyè lane remake anpil timoun nan zòn nan gen gwo difikilte pou yo jwenn lamanjay ak dlo pou yo bwè san konte pwoblèm lopital, lekòl, elatriye.

Kòdonatè jeneral OSET la, Claudy Joseph, kwè gen gwo malè ki pandye sou tèt timoun yo nan depatman Sid la si Leta ak lòt enstitisyon yo pa pote sekou bay sila ki plis nan nesesite yo . Claudy Joseph raple OSET gen 4 lane depi l ap òganize klinik mobil, distribiye kit eskolè nan plizyè lekòl, separe kit alimantè ak divès lòt aksyon pou ede timoun yo.

Kòdonatè a di manm òganizasyon an gen anpil volonte pou kontinye akonpaye timoun yo, men yo manke mwayen. Li souliye se gras ak bourad lajan kèk bon samariten ki pèmèt OSET ede timoun yo. Rèsponsab la ankouraje tout lòt òganizasyon ak sitwayen ki gen posibilite pou ede ankadre timoun yo.

Mesye Claudy Joseph raple si sosyete a pa ankadre timoun yo jodi a yo ka tounen yon gwo menas pou sosyete a.

Kreyòl Enfo

Kreyòl Enfo, 5 novanm 2021.- Malgre piblikasyon yon nòt pou entèdi polisye ak inifòm pran liy nan ponp gaz yo, yon gwoup ajan Inite sekirite jeneral palè nasyonal (USGPN, sig nan lang franse) maspinen, vandredi 4 novanm nan, plizyè chofè taksi motosiklèt ki t ap tante achte gaz nan ponp Kalfou Tifou a (Pòtoprens).

Plizyè temwen ki rapòte enfòmasyon an eksplike polisye yo debake nan ponp la ak plizyè gwo galon jòn epi pase tout moun ki te deja ap tann lòd pou mete kò yo sou kote. Kèk nan chofè taksi motosiklèt ki pat vle deplase pase yon move moman anba men polisye yo.

Chofè motosiklèt yo ak lòt sitwayen ki t ap tante achte gaz nan ponp la tou te kalonnen polisye ak ķout wòch. Ajan USGPN yo tire plizyè katouch anlè pou kalme sitiyasyon an.

Se prèske nan tout peyi a polisye ak tout inifòm ap goumen nan liy pou achte gaz nan divès ponp nan peyi a. Yon seri imaj ki degrade plis toujou enstitisyon polisyè a ki te deja ap fè fas ak anpil kritik nan sosyete a.

Kreyòl Enfo

Kreyòl Enfo, 22 avril 2021.- Bandi nan gang 400 Mawozo libere, jodi jedi a (22), twa (3) pami relijye yo te kite kidnape depi anviwon 12 jou. Pòt pawòl Konferans relijye ayisyen yo (CHR, sig nan lang franse) pè Gilbert Peltrop ki konfime enfòmasyon an prezise 2 sitwayen fransè yo toujou anba men bandi yo.

Kriminèl yo aksèpte libere 3 nan otaj yo nan kad yon « echanj » ak Leta ayisyen. Daprè enfòmasyon ki rive jwenn redaksyon Kreyòl Enfo (KE) , bandi 400 Mawozo yo ta egzije liberasyon Yonyon, youn nan manm ki fonde gang la, avan yo libere relijye yo. Leta ayisyen ta koube anba egzijans bandi yo epi libere Yonyon ki te fèmen nan penitansye nasyonal.

Nan yon mesaj vokal ki t ap fè laviwonn rezo sosyal yo, lidè 400 Mawozo a, Lanmò san jou, te deklare Leta ayisyen an dwe fè yon jès si yo vle jwenn liberasyon relijye yo. Rèsponsab legliz katolik kontinye egzije liberasyon frè ak sè yo ki toujou anba men bandi yo.

Kreyòl Enfo