Category:

POLITIK

AKTYALITEPOLITIK

Òganizasyon Nasyonzini lonje dwèt sou Moise Jean Charles nan kontrebann zangi

by Kreyòl Enfo
Kreyòl Enfo

Kreyòl Enfo, 7 oktòb 2026.- Yon gwoup ekspè nan Òganizasyon Nasyonzini ( ONI) lonje dwèt sou ansyen senatè Moise Jean Charles ki ta nan yon rezo k ap fè trafik zangi. Daprè yon rapò ekspè yo pibliye, lidè Pitit Desalin nan ta itilize rezo sa pou jwenn otorizasyon anba tab pou voye vann zangi nan lòt peyi.

Moise Jean Charles ta fè presyon tou sou ajan ladwàn yo pou fòse yo kache orijin machandiz la, toujou daprè rapò a. Anketè Òganizasyon Nasyonzini yo fè kwè ansyen palmantèta a ta lakoz Leta ayisyen pèdi yon pil lajan ak rezo kontrebann sa.

Moise Jean Charles ki pale ak redakayon Kreyòl Enfo denonse « yon konplo » li di ekspè Nasyonzini yo melanje ak oligak ayisyen ap fè pou sal imaj li. Lidè Pitit Desalin nan bay garanti  » konplo sa p’ap pase ».

Òganizasyon Nasyonzini te tanmen ankèt sou Moise Jean Charles la nan vil Fòlibète depi nan lane 2024.

Kreyòl Enfo

0 comments
AKTYALITEPOLITIK

Eleksyon : Gary Bodeau, kandida pou pòs prezidan, vizite plizyè pwojè nan Nòdwès ki te kòmanse pandan adminisyon Jovenel Moise la

by Kreyòl Enfo
Kreyòl Enfo

Kreyòl Enfo, 5 oktòb 2026.- Kandida pou pòs prezidan anba banyè REKONSILYE a, Gary Bodeau, fè yon virewon politik nan depatman Nòdwès la pandan Wikenn nan. Pandan deplasman sa, ansyen Prezidan chanm depite a te vizite plizyè pwojè ki te kòmanse pandan administrasyon ansyen prezidan Jovenel Moise la.

Nan vil Pòdepè, kandida REKONSILYE a te vizite santral elektrik Lasalin nan, ansanm ak lokal pwojè jeyotèmi an « Geo-Plasme ». Gary Bodeau eksplike si yon prezidan te kòmanse yon pwojè, li pa dwe disparèt lè manda prezidan sa fini, men pito li dwe ranfòse nan benefis popilasyon an.

Kandida a deja fè virewon politik sa yo nan lòt depatman nan peyi a. Nan Nip, semèn pase a, Gary Bodeau te pwomèt pou l rekonsilye nasyon an. Li raple yon pèp ki divize pap kapap pwogrese.

Nan Nòdwès, ansyen depite a souliye plizyè sektè estratejik li idantifye kòm priyorite pou mete peyi a sou wout chanjman. Gary Bodeau envite tout ayisyen mete men pou retire peyi a nan sitiyasyon malouk l ap travèse jounen jodi a.

Konsèy Elektoral Pwovizwa a, nan yon nòt li pibliye semèn pase a, raple tout moun peryòd kanpay la poko kòmanse. KEP voye yon pinga bay tout potansyèl kandida, pati ak gwoupman politik ki tá gen lide fè kanpay avan dat ki prevwa nan dekrè elektoral la.

Kreyòl Enfo

0 comments
AKTYALITEELEKSYONPOLITIK

Eleksyon : komisè Muscadin ak « Pwofèt Markinson » kandida anba lobedyans menm pati Politik

by Kreyòl Enfo
Kreyòl Enfo

Kreyòl Enfo, 30 septanm 2026.- Komisè gouvènman  Miragwàn nan, Jean Ernst Muscadin, enskri sou sit Konsèy Elektoral Pwovizwa kòm kandida pou pòs prezidan anba lobedyans pati Fòs Chanjman Nasyonal (FCN). Toujou jodi mèkredi a, Markinson Dorilas moun plis konnen sou non « Pwofèt Markinson » enskri pou pòs senatè Lwès anba menm pati a politik la.

Kontrèman ak egzijans dekrè elektoral la, komisè Muscadin enskri san li pa demisyone. Sepandan, daprè atik 153, paragraf 16 nan dekrè elektoral la, yon ofisyèl nan Leta a dwe demisyone nan pòs li 2 mwa avan li enskri kòm kandida.

Markinson Dorilas ki enskri pou pòs senatè anba menm pati politik la gen sèlman 10 jou depi li soti nan prizon. Pwofèt Markinson te pase plizyè mwa nan prizon pou yon dosye eskwokri. Jij enstriksyon Étienne Mercier ki te siyen desizyon pou libere pwofèt la mande pou dezòmè kandida a toujou rete disponib pou lajistis.

Enpòtan pou n raple pwofesè Augustin D’Mezza te demisyone nan tèt Fòs Chanjam Nasyonal ayè madi a. Plizyè sous pwòch pati a fè kwè se akoz direksyon pati a chwazi pwofèt Markinson pou senatè ki pouse pwofesè a kite tèt pati a.

Kreyòl Enfo

0 comments
AKTYALITEENSEKIRITEPOLITIK

Baradè : ansyen depite Clément Dupner mouri, otorite yo anonse yon ankèt

by Kreyòl Enfo
Kreyòl Enfo

Kreyòl Enfo, 24 septanm 2026.-  Sitwayen nan komin Baradè, nan depatman Nip, dekouvri maten jedi a (24) kadav ansyen depite Dupner Clement nan lakou lakay li. Jij depè Ociel Josaphat ki te fè konsta legal yo siyale te gen san nan bouch viktim epi atè bò kote kadav la.

Aprè analiz yon medsin ak yon enfimye, jij depè a te bay lòd pou leve kadav la epi al mete l nan mòg. Otorite nan depatman Nip la anonse ouvèti yon ankèt pou fè limyè sou sikonstans ansyen palmantè a pèdi lavi l.

Dupner Clement anpil moun konnen sou non « Kafou” te reprezante sikonskripsyon Baradè – Gran Boukan nan 49e lejislati a. Enfòmasyon kèk pwòch ansyen palmantè pataje ak Kreyòl Enfo konfime Dupner Clement t ap prepare l pou al kandida nan eleksyon ki ta dwe fèt 13 desanm k ap vini la a.

Kreyòl Enfo

0 comments
ENFÒMASYONPOLITIK

IJAN : Senatè Nenel Cassy ak plizyè militan politik jwenn arèstasyon yo nan vil Miragwàn

by Kreyòl Enfo
Kreyòl Enfo

Kreyòl Enfo, 21 janvye 2021.- Komisè gouvènman Miragwàn nan arete, aprè midi jedi a (21), ansyen Senatè Nip la, Nenel Cassy, aprè yon manifestasyon opozisyon an t ap òganize nan vil la pou egzije Jovenel Moise kite pouvwa a 7 fevriye 2021.

Plizyè lòt militan politik pami yo pwofesè Jeanty Manis ak Cadet Ebens jwenn arèstasyon yo tou. Pou kounye a, Senatè Nenel Cassy ansanm ak lòt moun ki arete yo nan gadavi komisarya Miragwàn nan.

Kawoutchou deja ap boule nan plizyè kwen nan vil Miragwàn pou mande liberasyon Senatè a ansanm ak lòt militan yo.

Kreyòl Enfo 

0 comments
AKTYALITEPOLITIK

Ayiti-politik : yon minis Tèt Kale pwovoke gwo latwoublay nan Lakoudèkont

by Kreyòl Enfo
Kreyòl Enfo

Kreyòl Enfo, 23 septanm 2020.– Gwo eskonbrit pete, aprè midi mèkredi 23 septanm 2020 an, nan lokal Lakoudèkont ak kontansye administratif (CSC/CA, sig nan lang franse). Daprè enfòmasyon prezidan enstitisyon an, Rogavil Boiguéné, konfime pou redaksyon Kreyòl Enfo (KE), deblozay sa pete aprè minis travo piblik, transpò ak kominikasyon an, Joiseus Nader, te debake britsoukou nan lokal la.

Prezidan CSC/CA a denonse minis la li di ki debake ak yon dividal nèg ak gwo zam fanm fwa ansanm ak plizyè jounalis. Mèt Boiguéné souliye minis Nader rantre nan tout espas sansib ki genyen nan lokal enstitisyon an kote anplwaye yo ap travay sou anpil dosye kòripsyon tankou PetwoKaribe.

Rogavil Boiguéné te pase lòd pou fèmen tout baryè epi egzije prezans yon jij depè nan espas la pou fè konsta legal yo avan li pèmèt minis la kite lokal la. Chèf gouvènman an, Joseph Jouthe, te oblije ale nan lokal CSC/CA a pou pèmèt Joiseus Nader soti nan lokal la ansanm ak moun ki te akonpaye l yo.

Gwo bouch louvri te deja egziste nan mitan CSC/CA ak manm pouvwa Egzekitif la aprè jij yo te refize bay avi favorab ak yon seri akò Leta ayisyen ta pral siyen ak konpayi « General Electric » pou pwodwi kouran.

Kreyòl Enfo

0 comments
AKTYALITEPOLITIK

Nevyèm semèn « peyi lòk » : presyon an ap ogmante sou tèt Jovenel Moise

by Kreyòl Enfo
Kreyòl Enfo

Kreyòl Enfo, 4 novanm 2019 .- Sitiyasyon an toujou rete mangonmen, jodi lendi a (4), nan kapital la (Pòtoprens) ak divès vil pwovens toujou nan kad batay k ap mennen pou fòse prezidan Jovenel Moise kite pouvwa a.

Malgre garanti pouvwa a te bay pou pèmèt lavi reprann nan peyi a, Kreyòl Enfo konstate gwo barikad bloke prèske tout gwo kalfou nan zòn metwopolitèn Pòtoprens la. Anpil katouch ap tire tou nan zòn Matisan ak Dèlma 47..

Pou yon nevyèm semèn youn kole ak lòt, tout aktivite yo rete paralize nan kapital la. Lekòl pa fonksyone, gwo magazen ak labank rete ak pòt yo fèmen. Machin ak motosiklèt prèske pa sikile tou akoz barikad yo ki monte disèt wotè.

Plizyè inite nan Lapolis nasyonal la ansanm ak ajan CNE ap tante retire barikad yo. Sa ki lakoz gwo eskonbrit nan mitan fòs lòd yo ak pwotestatè k ap veye barikad yo nan divès katye.

Kreyòl Enfo

0 comments
POLITIKAKTYALITE

Senatè Joseph Lambert vire do bay prezidan Jovenel Moïse epi rantre nan opozisyon

by Kreyòl Enfo
Kreyòl Enfo

Kreyòl Enfo, 20 dawout 2019.- Prezidan Jovenel Moïse ak pouvwa Tèt kale a kontinye ap pèdi alye nan sena Repiblik la. Aprè senatè Saurel Jacinthe (Grandans) mwa pase a, senatè Sidès la Joseph Lambert anonse, lendi 19 dawout la, li vire do bay pouvwa a epi rantre nan opozisyon.

Sou kont twitè li, ansyen prezidan asanble nasyonal la ekri : « Pou peyi m, tout solidarite mwen te bay la (ak pouvwa a) kanpe pou yon opozisyon eklere epi konstriktiv ».

Senatè Joseph Lambert di li regrèt divès aksyon prezidan Jovenel Moïse ap poze yo riske lage peyi a nan yon katchouboumbe politik ak ekonomik.

« Zannimo politik la » pa ekate posibilite pou desann sou beton an pou manifeste kont prezidan Jovenel Moïse li estime k ap  » kraze peyi a ».

Kreyòl Enfo

0 comments
AKTYALITEPOLITIK

Ofisyèl : Jean Michel Lapin demisyone

by Kreyòl Enfo
Kreyòl Enfo

Kreyòl Enfo, 22 jiyè 2019.- Nan yon lèt li voye bay prezidan Sena repiblik la jodi lendi 22 jiyè a, prezidan Jovenel Moïse konfime premye minis nome a remèt demisyon li.

Chèf Leta a, toujou nan lèt sa, envite prezidan Sena a, Carl Murat Cantave, nan diskisyon pou chwazi yon nouvo premye minis « jan atik 137 konstitisyon amande a » egzije sa.

Sepandan, plizyè lidè nan opozisyon an deja leve vwa yo pou siyale « peyi a pa gen yon pwoblèm premye minis ». Pou senatè Antonio Chéramy « se sèl prezidan Jovenel Moïse ki pou demisyone pou kriz la rezoud ».

Nap raple prezidan Repiblik la te deziye Jean Michel Lapin premye minis nan dat 8 avril pase a. Men, chèf gouvènman an pat gen chans pase devan palman an pou seyans ratifikasyon. Malgre 2 tantativ, senatè yo pat rive ratifye premye minis lan akoz yon gwoup 4 senatè te anpeche dewoulman seyans sa yo.

Kreyòl Enfo

0 comments
kreyolenfo.com. Tout dwa yo rezève.