Pòtoprens, 30 janvye 2019 .– Lamizè ogmante nan tout peyi a depi lè goud la pa sispann pèdi valè devan dola ameriken an, daprè obsèvasyon plizyè ekonomis.
Pwofesè Camille Charlmers ki t ap bat bouch sou sitiyasyon an ak yon gwoup jounalis di tout siyal yo montre Ayiti sou wout yon eklatman sosyal. Ekonomis Etzer Emile, li menm tou, panse peyi a ka tonbe nan yon gwo deblozay sosyal ak politik si otorite yo pa pran rèsponsabilite yo.
Plizyè sitwayen nan kapital la ki pale ak Kreyòl Enfo pa kache kòlè yo devan sitiyasyon malouk sa. Pi fò nan moun sa yo ki pa konn ki sen pou yo priye pou ede yo reziste anba lamizè a prevwa yon gwo latwoublay nan tout peyi a si anyen pa fèt pou redwi lamizè a.
Ayè madi 29 janvye a, yon moun te bezwen 81.50 goud pou yon dola vèt. Prèske chak jou 25 oubyen 50 santim ogmante sou kantite lajan yon moun bezwen pou achte yon dola ameriken. Nan mwa janvye 2018, yon moun te bezwen 64 goud pou yon dola.
Kreyòl Enfo
