Home Dyaspora Chili : yon jèn antreprenè ayisyen blese anba bal

Chili : yon jèn antreprenè ayisyen blese anba bal

by Kreyòl Enfo

Kreyòl Enfo, 31 me 2020 .- Fenel Saintilma, pwopriyetè konplèks « Fenel magazen » ki nan zòn metwopolitèn Santyago (Chili) blese anba bal bandi, 16 me pase a, anndan youn nan lokal antrepriz yo. Jèn antreprenè a pèdi anviwon 6 milyon peso chilyen ( 7 mil dola ameriken) pandan atak sa.

Antreprenè Fenel Saintima ( Foto koutwazi)

Daprè enfòmansyon viktim nan pataje ak redakasyon Kreyòl Enfo (KE), se 4 vòlè chilyen ki debake nan lokal konplèks « Fenel Magazen » epi rale zam sou tout anplwaye ak kliyan ki te nan espas la. Li eksplike  » bandi yo te tire plizyè katouch avan yo fouye tout moun ». Youn nan katouch yo pèse jarèt Fenel Saintima ki pase plizyè jou lopital ap pran laswenyay.

Antreprenè ayisyen an presize nan konplèks la gen biwo pou fè transfè lajan, pwodwi kosmetik, foto kopi ak Baber Shop. Fenel Magazen gen yon sèvis tou ki pèmèt moun peye dlo ak kouran. Bandi yo pran tout lajan ki te nan kès antrepriz yo.

Fenel Saintima, 36 lane, soti nan vil Wanament (Nòdès). L ap viv Chili depi nan lane 2008. Jèn antreprenè a gen yon lisans nan administrasyon.

Kreyòl Enfo

0 comment