Kreyòl Enfo, 26 septanm 2026.- Ajan nan divès inite nan Polis Nasyonal Ayiti a ( PNH, sig nan lang franse) ap mennen yon seri operasyon nan komin Kenskòf, depatman lwès, depi semèn pase a, daprè enfòmasyon ajan egzekitif Massillon Jean konfime. Premye sitwayen Kenskòf la fè kwè fòs lòd yo deja rekipere plizyè lokalite nan komin nan pami yo « Bwa Avril ».
Prezidan konsèy kominal la di gen plizyè bandi nan gang « Didi » ap dirije a ki tonbe pandan yo t ap boukante kout bal ak lapolis. Massillon Jean mande Fòs Lame Ayiti a (FAd’H, sig nan lang franse) apiye Polis Nayonal la epi okipe espas ki libere yo.
Move kondisyon wout yo se youn nan gwo difikilte ajan fòs lòd yo rankontre pandan operasyon yo, daprè ajan egzekitif la. Li mande pou ministè travo piblik voye yon ekip teknik pou netwaye wout yo yon manyè pou pèmèt polisye yo atake bandi yo pi fasil.
Mwa pase a, bandi ak zam ki nan òganizasyon teworis Viv Ansanm fè plizyè masak nan vil Kenskòf ak lokalite ki viwonnen l yo. Pandan masak sa yo, pou pi piti 164 moun pèdi lavi yo, daprè yon rapò ankèt Rezo Nasyonal Dwa Moun yo ( RNDDH, sig nan lang franse).
Kreyòl Enfo
