Kreyòl Enfo, 10 oktòb 2026.- Aprè konfizyon ki te genyen pandan tout aprè midi a nan enfòmasyon konsènan eta sante majistra Kenskòf la , Jean Massillon, boutofen se konfime li rann dènye souf li aswè vandredi 9 oktòb 2026 la. Se youn nan majistra adwen yo, Jean Max Duvivier, ki konfime nouvèl la pou divès medya.
Daprè enfòmasyon yo, jodi a ajan majistra a t ap vizite yon zòn yo rele « Bwa Avril » bò midi konsa, epi britsoukou li santi yon malèz, li gen pwoblèm pou l respire. Yo kouri mennen l lakay li epi rele yon anbilans pou mennen l lopital. Anbilans la ta pral rive aprè plizyè èd tan, daprè yon temwen.
Gen enfòmasyon ki fè kwè kè majistra a te sispann bat depi nan anbilans lan pandan yo t ap mennen l lopital la. Sepandan, Jean Max Duvivier di se nan yon lopital nan zòn mwtwopolitèn Pòtoprens la Massillon Jean rann dènye souf li.
Sou rezo sosyal yo anpil moun k ap reyaji sou lanmò a panse se yon atak mistik ki jete majistra a. Sou Fesbouk, yon moun ki t ap kòmante di “ bandi yo wè yo paka rive sou majistra ak zam, yo kraze l ak majik « .
N ap raple, Massillon Jean se te yon poto mitan nan batay kont gang ak zam ki anvayi komin Kenskòf depi mwa janvye 2025. Li te toujou ap ankouraje fòs lòd yo mennen operasyon pou kwape zagoloray yo.
Kreyòl Enfo
