Kreyòl Enfo, 19 septanm 2026.- Yon gwoup 114 militè ayisyen kite peyi a, ayè vandredi a (18), pou al patisipe nan yon fòmasyon 8 semèn nan peyi Meksik. Ministè Defans ki anonse nouvèl la presize kontenjan militè ayisyen ki ale Meksik la gen 108 nouvo sòlda ak 6 akonpayatè.
Fòmasyon sa ki rantre nan kad koperasyon Ayiti ak Meksik gen pou objèktif ranfòse kapasite sòlda ayisyen yo pou mennen bon jan operasyon ak modènizasyon Fòs Lame Ayiti a ( FAd’H, sig nan lang franse), daprè rèsponsab ministè defans yo. Direktè pou Amerik santral ak karayib la nan ministè Relasyon eksteryè meksiken, Carlos Imanol B. Reyes, sou bò pa l siyale Ayiti ak Meksik ap viv yon moman istorik depi lè 2 peyi yo kòmanse genyen relasyon diplomatik.
Nan non Fòs Lame Ayiti a, kolonèl Néoclès Arné remèsye otorite meksiken yo pou kontribisyon peyi Meksik pote nan fòmasyon nouvo militè ayisyen yo. Kolonèl la prezante koperasyon sa tankou yon lòt pa ki franchi nan pwosesis rekonstriksyon FAd’H la.
Mario Andrésol k ap dirije ministè ayisyen defans la pa janm sispann raple objèktif li se ogmante kantite sòlda ki nan lame a epi pèmèt yo jwenn bon jan materyèl ak fòmasyon pou pèmèt lame a garanti defans tèritwa nasyonal la epi kontribiye nan tabli bon jan sekirite ak lapè nan peyi a.
Kreyòl Enfo
