Tag:

Donald Trump

AKTYALITEENTÈNASYONAL

Etazini : defèt istorik pou Donald Trump ki pèdi majorite nan 2 branch Kongrè a

by Kreyòl Enfo
Kreyòl Enfo

Kreyòl Enfo, 4 novanm 2026.- Pati Demokrat la genyen majorite syèj nan 2 branch Kongrè ameriken an aprè eleksyon mwatye manda (midterms) ki dewoule ayè madi 3 novanm 2026 la. Rezilta sa yo se yon defèt istorik pou prezidan repibliken an, Donald Trump, ki pral gen difikilte pou enpoze gwo desizyon politik li yo.

Nan eleksyon pou yon bout nan Sena a, pati Demokrat la genyen 20 syèj, pami yo 7 ki te anba kontwòl Repibliken yo. Dènye rezilta pasyèl yo montre Demokrat yo ap okipe pou piti 54 syèj sou 100 . Yo te bezwen sèlman 51 syèj pou asire majorite senatè yo.

Sou 435 syèj ki disponib nan chanm depite a, demokrat yo genyen 228, pami yo 25 te anba kontwòl repibliken yo. Pati Demokrat la te bezwen sèlman 218 pou pran majorite a.

Prezidan Donald Trump ki rekonèt defèt la di li pare pou travay ak reprezantan demokrat yo. Prezidan ameriken an panse lagè kont Iran an gen konsekans sou rezilta eleksyon yo. Toutfwa, Donald Trump fè kwè repibliken yo pèdi eleksyon an paske se pa foto ki te sou bilten yo.

Eleksyon « midterms » yo ap chanje konplètman ekilib pouvwa a nan peyi Etazini, sitou aprè pati Donald Trump la pèdi kontwòl li te genyen nan 2 chanm yo.

Kreyòl Enfo

0 comments
AKTYALITEENTÈNASYONAL

Etazini :  » midterms », yon eleksyon ki ka chanje politik ameriken nan tout mond la

by Johnson DEROSIN
Johnson DEROSIN

Kreyòl Enfo, 3 novanm 2026.- Madi 3 novanm sa se jou eleksyon mwatye manda (midterms) nan peyi Etazini. Se youn nan eleksyon ki pi desizif, pa sèlman pou pèp ameriken an, men tou pou lemond antye. Eleksyon mwatye manda yo pral detèmine konpozisyon yon nouvo Kongrè ( chanm depite) epi renouvle yon pati nan Sena a. Si previzyon ak sondaj yo tonbe daplon, Donald Trump riske pèdi kontwòl tou 2 chanm yo.

Jiska prezan, majorite sa a te pèmèt Trump fè pase kèk nan mezi ki pi kontwovèse li yo, tankou enpoze dwa ladwàn sou lòt peyi. Si li ta pèdi avantaj sa a, prezidan ameriken an riske vin tounen sa yo rele nan Washington yon « kanna bwete » , yon prezidan ki pèdi nan pouvwa reyèl li kote branch lejislatif la ka bloke l nan yon seri desizyon politik enpòtan.

Donald Trump deja anonse, si sa ta rive, li pral tounen « Mesye Veto », sa vle di li pral mete veto sou tout lwa Kongrè a vote. Sa ap tounen yon fason pou l deklare lagè ant branch gouvènman yo, nan lide pou l fòse yon akò politik. Nan yon sitiyasyon konsa, kote gen konfli ant branch egzekitif la ak branch lejislatif la, gen yon gwo risk pou peyi a tonbe nan yon blokaj politik pandan 2 lane ki rete nan manda Trump la.

Se pou rezon menm eleksyon sa yo enpòtan anpil ni pou Etazini ni pou rès mond lan.

Johnson DEROSIN 

0 comments
AKTYALITEENTÈNASYONAL

Brezil : Lula ak Bolsonaro kòtakòt nan yon eleksyon ki anba menas enjerans ameriken

by Johnson DEROSIN
Johnson DEROSIN

Kreyòl Enfo, 3 oktòb 2026.- Dimanch 4 oktòb sa plis pase 158 milyon brezilyen anrejistre pou al vote nan eleksyon jeneral yo. Sou 12 kandida ki nan kous la pou pòs prezidan, Luiz Inácio Lula da Silva (PT, degoch ) ak Flávio Bolsonaro (PL, ekstrèm dwat) se 2 favori yo. Dènyè sondaj ki pibliye lavèy eleksyon an montre aktyèl prezidan an, Lula, gen 45 % nan entansyon vòt yo, pandan Flávio Bolsonaro, pitit ansyen prezidan Jair Bolsonaro, vini touswit dèyè ak 42%.

Pandan kanpay la, prezidan Lula vann bilan li. Tout sa li reyalize nan tèt peyi Brezil pandan 3 manda. Kandida PT a raple tou batay ak lit li mennen kont inegalite sosyal ak povrete. Lula pwomèt l ap mete 15% sou lajan chak fanmi ki benefisye pwogram sosyal « Bolsa Família » a.

Kandida ekstrèm dwat la sou bò pa l pwomèt l ap konbat krim òganize, defann valè lafanmi, liberalizasyon ekonomi an epi rapwoche Etazini nan dosye jeyopolitik yo.

Enjerans Etazini se youn nan gwo menas ki pandye sou tèt eleksyon Brezil ane sa a. Prezidan ameriken an, Donald Trump, pa janm rate okazyon pou montre l ap soutni kan Bolsonaro a. Nan lane 2025, aprè lajistis te fin kondane ansyen prezidan Jair Bolsonaro pou tantativ Koudeta aprè defèt li nan lane 2022, prezidan ameriken enpoze gwo sanksyon kont pwodwi k ap soti nan peyi Brezil. Eduardo Bolsonaro, ti frè Flávio, abandone yon manda depite pou al viv Etazini nan lide pou fè lobby bò kote administrasyon amerikèn nan.

Jedi premye oktòb pase a gouvènman brezilyen an louvri yon ankèt sou tantativ yo di Etazini ap fè pou rantre bouch nan eleksyon an anfavè kandida ekstrèm dwat la. Yon ankèt ki louvri sitou aprè jounal britanik The Guardian di li gen enfòmasyon Etazini ta envesti yon milyon dola vèt bay kèk òganizasyon nan sosyete sivil la ki opoze ak pouvwa Lula a.

158 milyon elektè yo, pami yo plizyè milye gen rasin yo Ayiti, ap gen pou chwazi yon prezidan ak vis prezidan, yon gouvènè, 2 senatè, yon depite federal epi yon depite pou eta yo oubyen distri federal la.

Johnson DEROSIN

0 comments
kreyolenfo.com. Tout dwa yo rezève.