Kreyòl Enfo, 21 oktòb 2026.- Nan yon mesaj li pibliye sou X ( Twitter), prezidan Salvadò a menesa pou fini ak gang yo Ayiti menm jan li fè l nan peyi Salvadò. Nayib Bukele konseye bandi yo pou pa pran pawòl li yo pou menas anlè. Li di « si yo remèt 4 sòlda salvadoryen yo vivan, tout bagay ap retounen jan yo te ye avan kidnaping nan.»
Nan mesaj sa li pibliye nan lang kreyòl, prezidan Bukele souliye 4 sòlda ki disparèt yo pa konbatan. Li presize « yo se teknisyen nan domèn avyasyon » ki deplwaye nan Fòs pou Konbat Gang yo (FRG, sig nan lang franse). Kontenjan ki soti Salvadò a genyen «sèlman pilòt ak pèsonèl teknik, ki gen kòm travay prensipal fè evakyasyon medikal epi sove lavi moun, pa fè lagè», toujou daprè Nayib Bukele.
Li eksplike bandi « kidnape sòlda yo nan yon fason lach pandan yo t ap retounen aprè yo te fin achte manje nan yon makèt nan zòn nan. Se poutèt sa, jodi a nou te lanse yon operasyon militè pou pote yo sekou. Nou gen yon sèl objektif : fè kat konpatriyòt nou yo retounen lakay yo vivan, san okenn mal»
Nayib Bukele di li vle chèf gang yo konprann atak jodi a pa anyen devan sa k ap vini si yo pa remèt kat otaj yo vivan. Prezidan an ki raple li deja fini ak fenomèn gang la nan peyi Salvadò, di li « kapab fini » ak li tou Ayiti.
Toutfwa, prezidan Bukele di gang yo toujou gen tan pou evite sa si yo remèt li 4 sòlda yo vivan.
Kreyòl Enfo
