Tag:

ENSEKIRITE

AKTYALITEENSEKIRITE

4 sòlda peyi Salvadò ki deplwaye nan Fòs pou Konbat Gang yo disparèt Kwadèboukè

by Kreyòl Enfo
Kreyòl Enfo

Kreyòl Enfo, 19 oktòb 2026 .- Kat (4) sòlda peyi Salvadò ki deplwaye Ayiti nan kad operasyon Fòs pou konbat Gang yo (FRG, sig nan lang franse) disparèt, depi ayè dimanch 18 oktòb la, nan zòn  Laplèn, komin Kwadèboukè.  Nan yon kominike, Lame peyi Salvadò ki konfime enfòmasyon an presize sòlda yo te pran nan yon zatrap (anbiskad) yon gwoup bandi te tann pou yo pandan yo t ap rantre nan baz nan yon machin blennde.

Gwoup kriminèl yo te itilize zam ak lòt aparèy eksplozif pou pyeje sòlda yo epi mete dife nan machin nan, daprè kominike a. Kominike Lame presize a presize sòlda yo te reyisi soti nan machin nan epi boukante anpil kout bal ak bandi yo.

Depi yèswa, Fòs pou Konbat Gang yo te voye elikoptè epi deplwaye yon gwoup sòlda atè pou soutni sòlda salvadoryen yo. Sepandan, bandi yo rive touche elikoptè a epi fòse fòs lòd yo repliye. Afwontman yo ta pral repann kèk èd tan aprè.

Fòs pou Konbat Gang yo ki anonse y ap kontinye ak operasyon pou rekipere sòlda yo mande abitan k ap viv nan zòn Laplèn rete lakay yo pou yo pa viktim. Kominike Lame Salvadò a pa presize si yo rive lokalize sòlda yo.

Kreyòl Enfo

0 comments
ENSEKIRITEAKTYALITE

Nasyonzini : nan 6 mwa, plis pase 3 100 moun pèdi lavi yo anba bal nan zòn metwopolitèn Pòtoprens la

by Kreyòl Enfo
Kreyòl Enfo

Kreyòl Enfo, 8 oktòb 2026.- Nan yon rapò ki pibliye mèkredi 7 oktòb la, yon gwoup ekspè nan Òganizasyon Nasyonzini (ONI) revele soti oktòb 2025 pou rive avril 2026, 3165 moun pèdi lavi yo akoz vyolans gang yo. 375 lòt sitwayen soti blese anba bal tou pandan peryòd sa.

Rapò ekspè yo souliye 613 nan viktim yo soti nan komin Site Solèy. Gen anpil moun ki viktim tou pandan gang yo ap boukante kout bal ak lapolis, daprè Nasyonzini. Plizyè milye moun kouri kite kay yo tou nan zòn ki anba kontwòl bandi yo.

Mete sou moun ki mouri ak blese yo, bandi yo plede fè kadejak tou sou fanm ak tifi nan divès katye. Ekspè yo siyale gang yo kontwole 70% nan zòn metwopolitèn Pòtoprens la.

Òganizasyon Nasyonzini lonje dwèt sou plizyè ansyen palmantè ki ta nan kòkòday ak bandi k ap fè san koule nan peyi a. Pami palmantè sa yo genyen ansyen senatè Nenel Cassy ak ansyen depite Kenskòf la, Alfredo Antoine.

Kreyòl Enfo

0 comments
AKTYALITEENSEKIRITE

Akayè : yon gwoup nèg ak zam anvayi mache a, otorite yo anonse dispozyon pou retabli lòd 

by Kreyòl Enfo
Kreyòl Enfo

Kreyòl Enfo, 26 septanm 2026.- Yon gwoup nèg ak zam anvayi mache Akayè a epi kòmanse teworize machann yo ak lòt manm nan popilasyon an, daprè yon kominike konsèy minisipal la pataje jodi samdi 26 septanm nan. Endividi sa yo ap egzije machanm yo peye lajan pou yo ka kite yo vann nan mache a.

Ajan egzekitif Wilner Réné ki denonse prezans nèg ak zam sa yo nan mache kominal la mande tout moun rete kalm. Li mande sitwayen yo pa fè okenn aksyon ki ka agrave sitiyasyon an.

Wilner Réné anonse meri a nan tèt kole ak Polis Nayonal Ayiti a ap pran dispozisyon pou retabli lòd, sekirite ak lapè nan mache a. Li raple tout resèt mache a dwe rantre nan kontabilite meri a epi sèvi pou amelyore kondisyon lavi moun yo nan komin nan.

Konsèy minisipal Akayè a di li pran angajman pou defann enterè komin nan epi travay pou ranfòsman sèvis piblik yo nan respè lalwa.

Kreyòl Enfo

0 comments
ENSEKIRITEAKTYALITE

Yon ofisye kenyen tonbe anba bal bandi nan Latibonit

by Kreyòl Enfo
Kreyòl Enfo

Kreyòl Enfo, 23 fevriye 2025 .– Yon premye sòlda nan Misyon miltinasyonal k ap apiye sekirite Ayiti a (MMSS) tonbe anba bal bandi, dimanch 23 fevriye a, nan zòn Savyen, depatman Latibonit. Sòlda ki mouri a te soti nan peyi Kenya, daprè sa Misyon an presize nan yon kominike.

Viktim nan te resevwa plizyè bal pandan yon operasyon ajan polis nasyonal Ayiti a nan tèt kole ak ofisye fòs MMSS la t ap mennen kont bandi yo nan lokalite Segi , zòn Savyen. Otorite yo te gentan kouri ak ofisye blese a nan elikoptè pou mennen li al pran laswenyay nan Lopital Nivo 2, nan Aspèn. Malerezman, sòlda a pat ka reziste anba blesi yo, li rann dènye souf li, toujou daprè eksplikasyon ki nan kominike a.

Misyon miltinasyonal k apiye sekirite Ayiti a te kòmanse deplwaye sou tèren an depi mwa jen 2024. Malgre anpil pwomès, misyon sa ki konpoze ak sòlda epi polisye ki soti nan plizyè peyi poko kapab ede frennen machin ensekirite a ki pa sispann krabinen sitwayen nan divès rejyon.

Kreyòl Enfo

0 comments
ENSEKIRITEAKTYALITE

Kenskòf : yon sòlda ayisyen ak yon ajan BSAP tonbe anba bal bandi

by Kreyòl Enfo
Kreyòl Enfo

Kreyòl Enfo, 16 fevriye 2025 .– Bandi k ap feraye nan gwoup kriminèl « Viv Ansanm » atake komin kenskòf douvanjou dimanch 16 fevriye 2025 la. Pandan atak sa zagoloray yo touye yon sòlda nan fòs lame Ayiti a ak yon ajan Brigad sekirite zòn pwoteje yo ( BSAP, sig nan lang franse).

Pòt pawòl polis nasyonal la, Lionel Lazarre, ki konfime enfòmasyon an souliye viktim yo t ap sekirize yon « pozisyon estratejik » ki rele Baz Teleko nan moman bandi yo te simen katouch epi wete lavi yo. De (2) lòt sòlda nan lame Ayiti a soti blese tou pandan atak sa.

Rèsponsab polis la ki pat bay presizyon sou idantite viktim yo fè kwè fòs lòd yo rive chase bandi yo ki te okipe Baz Teleko a. Enpòtan poun presize gen anpil materyèl telekominikasyon sitou antèn radyo ak televizyon nan pozisyon sa.

Depi nan kòmansman ane 2025 la, gwoup kriminèl Viv Ansanm ap tante pran kontwòl komin Kenskòf. Yon sitiyasyon ki deja lakoz plis pase 50 moun pèdi lavi yo anba bal asasen yo.

Kreyòl Enfo

0 comments
kreyolenfo.com. Tout dwa yo rezève.