Kreyòl Enfo, 17 oktòb 2026 .- Lafrans ap fè fas, jodi samdi 17 oktòb la, ak yon gwo mouvman pwotestasyon kont lavi chè, pwoblèm nan edikasyon piblik ak pri gaz la ki pa sispann monte. Pandan mouvman sa, manifestan ak lapolis te twoke kòn yo nan divès vil kote te gen anpil vyolans.
Pari, pwotestè yo sakaje epi piye plizyè biznis. Yo boule tou plizyè machin nan zòn plas repiblik la. Fòs lòd yo te itilize gaz lakrimojèn pou kouri dèyè pwotestè yo ki yo menm t ap tire anpil kout wòch sou polisye yo. Plizyè manifestan soti blese nan afwontman ak fòs lòd yo nan kapital la.
Nan vil Masèy, pwotestatè yo denonse pwofesè yo di ki manke nan sal klas yo. Yon gwoup manifestan ki pat kache kòlè yo fòse louvri pòt lokal meri a epi kraze vit ak mèb ki te nan yon sal. Yo tante mete dife tou nan yon komisarya. Fòs lòd yo te itilize yon kamyon dlo ak gaz lakrimojèn pou kontwole sitiyasyon an.
Te gen gwo tansyon tou nan divès lòt gran vil tankou Lyon, Lil ak Bòdo. Manifestan yo plenyen pou pri gaz la yo di ki pa sispann monte. Yo atake plizyè lokal meri, piye magazen, boule machin epi bloke wout ak tout sa yo jwenn sou pasaj yo. Gen yon manifestan ki pèdi men l ak yon grenad nan vil Sentetyèn.
Kandida pou pòs prezidan anba banyè « Lafrans Ensoumiz » la, Jean-Luc Mélenchon, te akonpaye pwotestatè yo ki mande Leta envesti 10 milya ewo nan edikasyon. Lidè pati degoch la kritike estrateji fòs lòd yo li di ki pa sispann pwovoke manifestan yo. Toutfwa, Jean Luc Mélenchon konseye manifestan yo pou evite rantre nan afwontman ak lapolis. Li di tou moun k ap piye magazen ak boule machin yo pa gen anyen pou wè ak jèn k ap mande pi bon kondisyon pou yo etidye.
Pou kounye a, sanble pouvwa Emmanuel Macron an poko gen okenn solisyon pou rezoud kriz sa ki kòmanse depi anviwon yon mwa.
Kreyòl Enfo
