Alix Didier Fils-Aimé

Kreyòl Enfo, 21 septanm 2026 .- Pandan deplasman li nan peyi Etazini pou patisipe nan 81e Asanble Jeneral Òganizasyon tout nasyon yo ( ONU, sig nan lang franse), Premye Minis Alix Didier Fils-Aimé pwofite rankontre kominote dyaspora ayisyen an nan Nouyòk. Pandan rankont sa, Alix Didier Fils-Aimé te salye prezans Carole Demesmin, yon zetwal nan kilti ayisyen an.

Premye Minis la raple Carole Demesmin se yon vwa ki make tout yon jenerasyon. Atis la kontinye ap pote, atravè zèv li, idantite, memwa ak richès kilti ayisyen an, toujou daprè chèf gouvènman an. Li souliye tou kontribisyon atis yo pote nan vann imaj Ayiti nan peyi etranje yo.

Se te lokazyon tou pou chèf Primati a te prezante priyorite gouvènman l lan bay kominote ayisyen an ki tabli nan Nouyòk, Etazini. Alix Didier Fils-Aimé fè kwè sekirite se pi gwo priyorite li genyen nan moman an. Li raple pwogram P4000 la ki vize ranfòse Lapolis, epi objèktif pou Fòs Lame Ayiti a gen 15 mil sòlda pandan 3 lane k ap vini la yo.

Premye Minis la di volonte li genyen tou pou gouvènman l ap dirije a òganize bon jan eleksyon epi retabli demokrasi nan peyi a. Alix Didier Fils-Aimé ankouraje dyaspora a rantre plis nan lavi ekonomik ak politik peyi a.

Kreyòl Enfo