Kreyòl Enfo, 12 jiyè 2020 .- Prezidan Jovenel Moise siyen lwa ki kreye zile Kayimit kòm nouvo komin nan peyi a. Arete sa ki pibliye 7 jiyè 2020 an presize zile Kayimit se 141e komin peyi a. Se zèl zile sou tèritwa nasyonal la ki poko te komin.
Pwojè lwa ki kreye zile Kayimit kòm komin nan, ansyen senatè Grandans Andris Riché te depoze nan palman an, te ratifye nan sena Repiblik la, 4 jiyè 2017 epi 2 avril 2019 nan chanm depite a. Menm lwa sa ki te retounen nan sena a t ap pral jwenn, yon lòt fwa ankò, benedikyon senatè yo 21 avril.
Zile Kayimit, 51, 29 kilomèt kare, trouve li nan yon distans 35 kilomèt ak gòlf Lagonav. Li gen 13 lokalite. Avan, li te yon katye nan komin Pestel. Nan lane 2016, zile Kayimit ta pral vin konsidere kòm twazyèm seksyon toujou komin Pestel.
Zile Kayimit k ap fè fas ak anpil pwoblèm enfrastrikti se youn nan zòn ki gen pi bèl plaj nan peyi a. Sepandan, otorite yo pa janm kreye kondisyon pou eksplwate plaj sa yo nan atire touris k ap flannen nan tout Karayib la.
Kreyòl Enfo