Kreyòl Enfo, 19 septanm 2019.- Yon jèn gason moun plis konnen sou non « Choubin » pèdi lavil anba bal, jodi jedi a (19), nan komin Gantye, depatman lwès.
Kèk abitan nan zòn nan Kreyòl Enfo te kontakte lonje dwèt sou yon ajan nan lapolis la kòm moun ki ta tire viktim nan. Daprè eksplikasyon yo, dram sa rive nan moman Choubin ansanm ak yon gwoup sitwayen t ap pwoteste pou egzije Leta ayisyen netwaye yon pon ki twouvel nan komin nan.
Pou montre kòlè yo, sitwayen nan zòn bloke wout prensipal la. Sa ki anpeche machin k ap soti nan zòn fwontyè Ayiti ak Sendomeng sitou Malpas rantre nan kapital la.
Manifestan yo te fè plizyè tantativ pou rantre pran polisye sispèk la andedan komisarya polis la, nan lide pou bay tèt yo jistis.
Kreyòl Enfo