Home Aktyalite Yon moun mouri, plizyè lòt blese : Vandredi latwoublay nan Pòtoprens

Yon moun mouri, plizyè lòt blese : Vandredi latwoublay nan Pòtoprens

by Kreyòl Enfo

Kreyòl Enfo, 20 septanm 2019.- Plizyè milye moun manifeste nan kapital la ak divès vil pwovens, jodi vandredi a (20), pou denonse lamizè, pwoblèm gaz epi mande prezidan Jovenel Moïse demisyone.

Pou pi piti yon moun pèdi lavi l pandan jounen mobilizasyon sa a. Enfòmasyon ki rive jwenn Kreyòl Enfo (KE) fè kwè se nèg ak zam nan yon machin prive ki pase epi simen katouch sou yon gwoup moun ki te kanpe nan Kafou Tifou (Pòtoprens). Pierre-Richard RIGUEUR, 32 lane, pèdi lavi l lapoula. 2 lòt sitwayen blese tou pandan atak sa.

Pi bonè nan jounen an, manifestan ki t ap lanse anpil move pawòl kont pouvwa Tèt Kale a te boule kawoutchou, voye wòch epi mete anpil barikad nan lari a. Lapolis te itilize gaz lakrimojèn ak bal kawoutchou pou kraze manifestasyon an.

Devan palè nasyonal, sou Channmas, plizyè manisfetan pami yon manb pati Ayiti An Aksyon (AAA) Senatè Youri Latortue ap dirije a blese ak yon bal kawoutchou.

Pòtoprens ak Komin ki viwonnen l yo ap fè fas ak gwo latwoublay depi kòmansman semèn nan kote sitwayen yo ap egzije demisyon Jovenel Moïse yo estime ki pa gen kapasite pou mennen bak peyi a.

Kreyòl Enfo

0 comment