Kreyòl Enfo, 26 novanm 2019 .- Yon gwoup pwotestatè k ap egzije demisyon prezidan Jovenel Moise nan tèt peyi a mete dife, jodi madi a (26), nan yon gwo kamyon ki t ap transpòte machandiz sou wout nasyonal nimewo 1 an (RN1),nan zòn Akayè (lwès).
Enfòmasyon ki rive jwenn redaksyon Kreyòl Enfo (KE) konfime pwotestatè yo ki plizyè dizèn menase pou mete dife sou tout machin ki franchi barikad yo. Militan sa yo lage anpil moso boutèy sou wout la nan lide pou anpeche sikilasyon machin ak moto.
Wout nasyonal nimewo 1 an bloke nan zòn Akayè depi kòmansman mouvman ”peyi lòk » nan mwa septanm nan pou fòse Jovenel Moise kite pouvwa a. Malgre tantativ plizyè inite espesyalize nan Lapolis la, yo toujou poko ka reprann kontwòl sitiyasyon an.
Kreyòl Enfo