Yon lòt manifestasyon pou egzije demisyon prezidan Jovenel Moise epi mande kote kòb PetwoKaribe a

Pòtoprens, dimanch 9 desanm 2018 .- Platfòm Pitit Desalin, Sektè Demokratik Popilè a ansanm ak plizyè lòt òganizasyon ap manifeste nan Pòtoprens ak zòn ki viwonnen l yo, jodi dimanch 9 desanm nan, pou egzije demisyon prezidan Jovenel Moise epi mande kote kòb PetwoKaribe a?

Pou lidè Pitit Desalin nan, Jean Charles Moïse manifestasyon jodi a se pou rekòmanse ak mobilizasyon ki pral « chavire pouvwa Tèt Kale a ansanm ak tout sistèm peze souze a » . Ansyen senatè Nò a di prezidan Jovenel Moise se reprezantan ti gwoup boujwa k ap fè kontrebann epi eksplwate moun ki pi pòv yo.

Youn nan pòt pawòl Sektè Demokratik Popilè a, Mèt André Michel, deklare pwosè PetwoKaribe a pap janm fèt toutan Jovenel Moise sou pouvwa a. Militan politik la siyale konpayi Agritrans sitwayen Jovenel Moise t ap dirije avan li te prezidan patisipe tou nan gaspiye lajan PetwoKaribe a.

Avoka militan an boude dyalòg pouvwa a tanmen ansanm ak aktè politik yo. André Michel anonse Sektè Demokratik Popilè a pap negosye ak gouvènman an. Avoka a fè kwè yo paka al negosye sou san moun ki viktim pandan manifestasyon yo mete sou sa ki tonbe pandan masak Lasalin nan.

Mèt André Michel di gen anviwon 200 moun ki tonbe anba bal pou konviksyon politik yo soti 17 oktòb pou rive nan kòmansman mwa desanm nan .

Kreyòl Enfo