Gonayiv, mèkredi 9 janvye 2019.- Pwosè kidnapè Clifford Brandt ak akolit li yo kite reprann madi 9 la, kanpe yon lòt fwa ankò. Jij Denis Pierre Michel voye pwosè a pou madi 15 janvye k ap vini la.
Majistra a pran desizyon sa yon fason pou l reponn ak demann ministè piblik ki mande pou ansyen enspektè polis, Edner Comé, vin reponn kesyon lajistis nan kad dosye a. Edner Comé gen akizasyon sou do l kòm moun ki te patisipe nan kidnape Nicolas ak Coralie Moscosso.
Reprezantan ministè piblik la, mèt Adisson Dirogène, salye desizyon jij Michel la. Li raple se Clifford Brandt menm ki te deklare se ansanm ak ansyen enspektè Edner Comé li te planifye kidnapin nan. Antreprenè Brandt fè kwè li te bay Edner Comé 2 mlyon dola ameriken, 16 oktòb 2016, pou òganize kidnaping nan.
Pou kounye a, Edner Comé fèmen nan prizon sivil Kwadèboukè, depatman Lwès, aprè yo te fin arete l nan peyi Repiblik dominikèn nan lane 2017.