Home Aktyalite Yon dezyèm jounen tansyon nan kapital la

Yon dezyèm jounen tansyon nan kapital la

by Kreyòl Enfo

Pòtoprens, 8 fevriye 2019 .- Kapital la konnen yon lòt jounen tansyon, jodi vandredi a (8), kote kawoutchou ap boule, wòch ap voye epi zam ap chante nan plizyè katye.

Yon polisye devan kawoutchou k ap boule Dèlma 75 ( foto : Edris Fortuné)

Zòn Channmas, lantouray palè nasyonal, sitiyasyon an te rete malouk pandan tout jounen an. Machin ak moto pat ka sikile nan zòn nan akoz yon gwoup pwotestatè k ap egzije demisyon prezidan Jovenel Moise t ap tire anpil wòch epi mete barikad nan tout wout yo.

Sitiyasyon an pa te depaman nan komin Dèlma ak Kwadèboukè kote pandan plizyè fwa lapolis te oblije twoke kòn yo ak manifestan. Nan Dèlma 3, enfòmasyon yo rapòte gen pou pi piti 2 moun ki te pèdi konesans ak sant gaz lakrimojèn.

Abitan katye Kafoufèy, Bisantnè, Lasalin ap viv ak lapèrèz akoz zam ki pa janm sispann chante pandan jounen an ak kòmansman lanwit la.

Deblozay pete nan kapital la ak zòn ki nan lantouray li yo depi ayè 7 fevriye a, dat opozisyon politik la te lanse mobilizasyon jeneral kont lamizè epi egzije Jovenel Moise kite pouvwa a.

Kreyòl Enfo

0 comment