Yon ayisyen mouri aprè 2 jou li pase ap soufri nan yon ayewopò Chili
Yon lòt konpatriyòt pèdi lavi l nan sitiyasyon ki pa twò klè nan peyi Chili. Joseph Henry, 40 lane, pèdi lavi l mwa pase a aprè 2 jou li pase nan ayewopò Santyago a. Konpatriyòt la ki te dwe retounen Ayiti te rate vwayaj la, daprè medya chilyen yo.
Platfòm enfòmasyon Bio Bio Chile presize yon dam te kouri ak Joseph Henry lopital lè li konstate sitwayen ayisyen te malad. Malerezman, Joseph Henry vale dlo bouch li 6 jou aprè akoz yon nemoni, daprè sa rapò medikal la revele.
Otorite chilyèn yo ap mennen ankèt pou konnen si anplwaye ki nan ayewopò a te refize pote viktim nan sekou malgre yo te konstate li malad.
Medya chilyen yo eksplike Joseph Henry t ap pwonmennen nan mache Araucania. Sa gen 2 mwa depi li te anonse otorite chilyèn yo li anvi retounen Ayiti, men li pa gen lajan pou achte tikè a. Kòm li te kòmanse malad grav, fanmi ki Ayiti te voye lajan pou l ka rantre nan peyi l. Joseph Henry mouri kite 3 timoun.
Lanmò konpatriyòt la pouse anpil ayisyen k ap viv nan peyi Chili mande ki wòl anbasad Ayiti ki nan vil Santyago a ?