Washington : ayisyen manifeste pou mande otorite ameriken yo sispann sipòte Jovenel Moise

👤 Kreyòl Enfo

Ayisyen k ap manifeste kont Jovenel Moise nan vil Washington

Kreyòl Enfo, 18 me 2021.- Sitwayen ayisyen k ap viv nan peyi Etazini manifeste nan vil Washington, madi 18 me a, pou mande administrasyon amerikèn nan sispann sipòte Jovenel Moise nan tèt Ayiti. Pwotèstatè yo raple, daprè atik 134.2 konstitisyon an, manda Jovenel Moise fini depi 7 fevriye 2021.

Dyaspora yo ki te soti nan divès eta nan peyi Etazini te pwofite fèt drapo Ayiti a pou denonse referandòm pouvwa Tèt Kale a pwograme pou 27 jen k ap vini la a. Yo siyale konstitisyon Ayiti a entèdi tout chanjman atravè referandòm.

Pankat nan men, manifestan yo raple prezidan ameriken an, Joe Biden, pwomès li te fè pandan peryòd kanpay la pou pa sipòte dirijan kòwonpi k ap vyole lalwa Ayiti. Yo menase pou pa vote kandida demokrat yo nan lòt eleksyon ki pral fèt Etazini nan ane k ap vini yo si Joe Biden pa « sispann pwoteje rejim Tèt Kale a ».

»   Premye minis Joseph Jouthe demisyone, Claude Joseph pran tèt gouvènman an pou yon ti bout tan

Te gen anpil pankat pou denonse tou fenomèn ensekirite ki tabli Ayiti pandan dènye tan sa yo.  Pwotestatè yo akize Jovenel Moise kòm otorite ki mare sosis li ak bandi pou anpeche popilasyon an manifeste.

Te gen manifestasyon kont Jovenel Moise tou nan divès vil Ayiti.

Kreyòl Enfo

ou ka enterese