Kreyòl Enfo, 3 me 2020 .- Minis Enteryè, Jistis ak Lapè nan peyi Venezyela, Nelson Reverol, denonse jodi dimanch la (3) yon « gwoup mèsènè ki soti Kolonbi » ki t ap fè tantativ pou anvayi peyi a douvanjou dimanch 3 me 2020 an. « Teyoris » yo t ap eseye pase nan lanmè zòn Guaira, daprè ofisyèl venezyelyen an.
Minis Reverol fè kwè objèktif operasyon teyoris sa se te asasinen lidè nan gouvènman venezyelyen an, ogmante vyolans yo epi lage konfizyon ak latwoublay nan mitan popilasyon an nan lide pou fasilite yon lòt tantativ koudeta.
Nestor Reverol di teyoris yo te gen gwo zam manch lang, fizi ak lòt materyèl ki ka eksploze. Se gras ak travay entèlijans lame a ansanm ak Polis Nasyonal Bolivaryèn nan ki anpeche yo lage Venezyela nan deblozay. Li presize plizyè teyoris mouri epi gen lòt ki jwenn arèstasyon yo.
« Sanble tantativ enperyalis ki friste tèlman yo vle chavire gouvènman lejitim Nicolas Maduro pouse yo komèt move zak ki merite pou pèp nou an ak kominote entènasyonal la kondane », daprè minis la.
Kreyòl Enfo