Tranbleman tè 6 oktòb : viktim nan Bwadòm yo kontinye ap tann sekou Leta ayisyen

Abitan nan Bwadòm, yon lokalite nan komin Gwomòn, kritike fason otorite nan komin nan ap jere èd ki disponib pou viktim tranbleman tè 6 oktòb pase a.

Kolaboratè Kreyòl Enfo ki te fè yon kout pye nan kanton an konstate gen sitwayen kay yo te kraze nan goudougoudou a ki toujou nan lari kote se moso tach ak bout twal yo kole pou dòmi. Sa ki pa anpeche tout zafè yo mouye lè lapli tonbe.

Yon notab nan zòn nan di malgre tout demach yo mennen lameri pa janm ba yo okenn asistans. Sitwayen an menase pou itilize lòt estrateji pou fòse otorite yo pran rèsponsabilite yo.

6 oktòb 2018 pase a, yon tranbleman tè mayitid 5.9 te souke depatman Nòdwès ak Latibonit kote plizyè dizèn te pèdi yo san konte dega materyèl.