Trae Young ak James Harden se meyè jwè 23e semèn NBA a

Kreyòl Enfo, 26 mas 2019 .- Espesyalis nan lig Baskètbòl Nò Ameriken an deziye jwè ki te plis briye nan chak konferans yo pandan semèn ki sot pase a.

Konferans lès

2 viktwa, yon defèt se bilan Atlanta Hawks soti 18 pou rive 25 mas . Hawks yo reyisi bon pèfòmans sa gras ak Trae Young ki fini meyè jwè konferans lès la pou semèn pase a. Pandan peryòd sa, T.Young woule ak yon mwayèn 25.3 pwen ak 11.3 pas nan chak match. Menè Hawks la ki sou premye ane li nan NBA a, ranpòte tit sa pou premye fwa nan karyè li.

Konferans lwès

Nan konferans lwès la, se James Harden ki fè lalwa pandan semèn pase a. Gras ak yon mwayèn 44.3 pwen , 6.3 rebon, 5.8 pas ak yon mwayèn 7 chout 3 pwen reyisi nan chak match, James Harden pèmet Houston Rockets fè 3 viktwa sou 4 match li jwe pandan peryòd sa . James Harden ranpòte tit sa pou 4èm fwa nan sezon an epi 22èm fwa nan karyè li.

Kreyòl Enfo