Home Aktyalite Tout aktivite bloke nan Kapital la

Tout aktivite bloke nan Kapital la

by Kreyòl Enfo

Kreyòl Enfo, 10 jen 2019 .- Pòtoprens ak vil ki viwonnen l yo leve « lòk » jodi lendi a (10 jen), toujou nan kad mobilizasyon pou egzije demisyon prezidan Jovenel Moïse nan tèt peyi a.

Kolaboratè Kreyòl Enfo k ap fè laviwonn nan lari a konstate lekòl pa fonksyone, pòt prèske tout magazen, gwo depo ak makèt rete fèmen. Transpò piblik la paralize nan kapital la, kote se sèlman motosiklèt ak kèk machin prive k ap sikile nan lari a.

Depi byen bonè maten an, kawoutchou ap boule nan plizyè katye tankou Santo (Laplèn) ak Bèlè. Zam ap chante tou nan zòn Dèlma 6, Lasalin ak nan lantouray lokal Palman ayisyen an ki sou bisantnè, kote yon seyans an asanble nasyonal ta dwe òganize jodi 10 jen an nan Palman an.

Lidè nan opozisyon an ansanm ak reprezantan plizyè gwoup « Petrochallenger » anonse mobilizasyon an ap rapouswiv nan tout peyi a jiskaske Jovenel Moïse kite pouvwa a.

Kreyòl Enfo

0 comment