Kreyòl Enfo, 23 septanm 2019 .- Endividi otorite yo poko idantifye jete poupou, douvanjou lendi a, devan sal seyans ak salon diplomatik sena Repiblik la.
Prezidan sena a, Carl Murat Cantave, ki deja nan lokal palman an poko vle reyaji sou zak sa. Toutfwa, reprezantan Latibonit la garanti tout dispozisyon ap pran pou pèmèt seyans ratifikasyon premye minis nome a, Fritz William Michel, dewoule pandan jounen an.
Depi byen bonè plizyè senatè nan opozisyon an pami yo Antonio Cheramy ( Don K-to) deja prezan nan palman an. Senatè lwès la anonse li menm ak kòlèg li yo ki nan opozisyon ak pouvwa Tèt Kale a ap fè tout sak posib pou anpeche seyans la fèt. Senatè « K-to » kritike prezidan Carl Murat Cantave li di ki vle òganize yon seyans san rèspekte règleman enteryè sena a.
Gen gwo bouch louvri tou nan mitan ajan fòs lòd k ap asire sekirite espas la ak militan ki bezwen rantre nan lokal palman an.
Kreyòl Enfo