Kreyòl Enfo, 14 me 2020 .- Pòtoprens konnen yon jounen tansyon, jedi 14 me a, kote manm gwoup «Fantom 509» yo te pran lari pou pwoteste kont arèstasyon kòlèg yo Alexandre Jean Pascal ki fèmen nan prizon penitansye nasyonal. Pwotestatè yo estime pakè Pòtoprens arete polisye a dèyè do lalwa.
Nan yon mesaj vokal k ap fè laviwonn rezo sosyal yo, Yanick Joseph, kòdonatris Sendika Polis Nasyonal Ayiti a (SPNH, sig nan lang franse), bay yon delè 6 èd tan pou libere polisye Alexandre Jean Pascal. Yanick Joseph di si sa pa fèt «polisye yo ka rantre nan penitansye nasyonal» epi pran Alexandre Jean Pascal.
Kòdonadris SPNH la kwè arèstasyon kòlèg li a se yon pretèks politisyen ki sou pouvwa a pran pou fòse yo kraze prizon an pou mete tout bandi deyò nan lide pou al prepare eleksyon. Yanick Joseph siyale se polisye ki antrene, yo konnen tout mannèv pou mete Alexandre Jean Pascal deyò.
Asasina, aksyon kriminèl, latwoublay, destriksyon byen piblik ak prive, se kèk akizasyon k ap peze sou do polisye Alexandre Jean Pascal ki t ap travay nan Brigad k ap lite kont trafik dwòg ak estifyan (BLTS, sig nan lang franse).
Kreyòl Enfo