Home Ensekirite Sitiyasyon lagè nan 3e sikonskripsyon Pòtoprens, pase 20 moun tonbe anba bal

Sitiyasyon lagè nan 3e sikonskripsyon Pòtoprens, pase 20 moun tonbe anba bal

by Kreyòl Enfo

Kreyòl Enfo, 14 avril 2020 .- Zam ap chante nan 3e sikonskripsyon Pòtoprens kote Baz Pilat ak bandi Vilaj Dedye ap twoke kòn yo depi 3 jou. Plis pase 20 moun gentan pèdi lavi yo depi lè deblozay sa eklate, daprè sa kèk abitan 3e sikonskripsyon an rakonte redaksyon Kreyòl Enfo.

Youn nan sitwayen yo eksplike « tansyon sa kòmanse depi aprè pouvwa a [Leta] fin koupe wout Bisantnè pou machin pa pase. Nèg 5 segond yo [Bandi Vilaj Dedye] ki pa ka pran lari ak machin pou al komèt move zak ni detounen kamyon machandiz rete bloke  » nan baz yo. Malgre anpil menas yo fè sou rezo sosyal ak nan kèk medya nan kapital la, otorite yo toujou kite Bisantnè a bloke.

Bandi « Baz Pilat ki pa janm danse kole ak nèg sa yo pwofite sitiyasyon sa epi atake Vilaj la » byen bonè maten dimanch 12 avril la. Bilan : anviwon « 16 moun mouri pami yo plizyè ti machann », toujou daprè temwen sa ki konfime  » plizyè « sòlda » nan baz 5 segond tonbe tou ».

Pou reponn ak atak sa, bandi « Vilaj Dedye ki jwenn sipò « sòlda » ki soti Granravin atake, depi ayè lendi a, zòn ki anba kontwòl Baz Pilat. Soti yè pou rive jodi a, anviwon 9 moun, pami yo plizyè inosan, pèdi lavi yo pandan 2 gwoup bandi sa yo ap twoke kòn yo sou Bisantnè, Pòtay Leyogàn, 2e, 3e ak 4e avni Bòlòs ».

Sitiyasyon tansyon sa lakoz machin prèske pa ka pran wout nasyonal nimewo 2 a pou ale nan depatman Sid, Sidès, Nip ak Grandans. Tout aktivite komèsyal bloke nan zòn nan tou.

Nan mitan katchouboumbe sa, Leta ayisyen parèt san fòs pou kontrekare bandi yo. Malgre plizyè tantativ lapolis fè pandan dènye semèn yo, bandi yo toujou ap fè lalwa nan 3e sikonskripsyon an.

Popilasyon an ki ta dwe konsantre tout fòs ak entèlijans li pou fè fas ak pandemi kovid-19 la oblije ap kouri sove kite kay yo pou pa viktim anba men bandi.

Kreyòl Enfo

0 comment