Kreyòl Enfo, 23 dawout 2020 .- Otorite yo nan tèt kole ak Pwoteksyon sivil mete, jodi dimanch la, alèt nan nivo vijilans wouj sou tout peyi a. Yon nivo alèt ki konfime siklòn Laura reprezante yon gwo malè pandye sou peyi a.
Tanpèt twopikal Laura ki kòmanse frape plizyè depatman depi douvanjou dimanch la deja fè anpil dega. Nan komin Ansapit (Sidès), yon tifi 10 lane mouri aprè yon pye bwa te fin tonbe sou yon kay.
Dlo k ap desann bwote 2 machann tou nan zòn « Tèt Dlo », yon lokalite nan komin Petyonvil. Van rache plizyè pye bwa epi kraze plantasyon peyizan yo tou nan divès rejyon peyi a, daprè enfòmasyon ki rive jwenn redaksyon Kreyòl Enfo (KE)
Gwo dlo ap desann tou nan basen atifisyèl Pelig la. Pwoteksyon sivil konfime gen mannèv k ap fèt pou deplase abitan soti Pelig pou rive Grandsalin kote flèv Latibonit reprezante yon gwo danje.
Inite Idwometeyowolojik Ayiti ak Pwoteksyon sivil konseye tout moun ki rete nan zòn riske ki abitye gen inondasyon ak deboulonnay tè pou yo deplase. Yo mande sitwayen yo pa chanbe dlo k ap desann epi pa fè tèt di pou yo pa viktim.
Kreyòl Enfo