Kreyòl Enfo, premye jen 2020 .- Sezon siklòn nan demare ofisyèlman Ayiti jodi lendi premye jen an. Espesyalis yo prevwa 3 jiska 6 gwo ouragan ka frape peyi a, daprè pwoteksyon sivil.
Nan yon lis 19 tanpèt tropikal, espesyalis yo prevwa 6 oubyen 10 ka frape rejyon atlantik la pami yo 3 jiska 6 gwo ouragan. Pami non siklòn ki ka touche rejyon an nou jwenn Arthur, Cristobal, Hanna, Marco, Paulette, Teddy ak Wilfred.
Prezidan Jovenel Moise anonse, sou Twitè, gouvènman an deja mobilize resous pou fè fas ak sezon siklòn nan pandan li envite popilasyon an pran anpil prekosyon epi rèspekte tout konsèy Pwoteksyon sivil yo.
Ane sa, sezon siklòn nan tonbe nan mitan yon pandemi mondyal akoz kovid-19 la. Sa ki rann sitiyasyon pi difisil pou yon peyi tankou Ayiti, daprè Premye minis Joseph Jouthe ki ankouraje popilasyon fè solidarite, youn ede lòt.
Òganizasyon ameriken World Risk Report revele, nan yon etid ki parèt nan lane 2017, Ayiti se peyi ki pi pa prepare nan Karayib la pou fè fas ak sezon siklòn.
Kreyòl Enfo