Home Aktyalite Sèlman São Paulo, eta ki resevwa pi fò Ayisyen k ap viv Brezil, kowonaviris gentan touye plis moun pase Lachin

Sèlman São Paulo, eta ki resevwa pi fò Ayisyen k ap viv Brezil, kowonaviris gentan touye plis moun pase Lachin

by Kreyòl Enfo

Kreyòl Enfo, 17 me 2020 .- Anviwon 100 mil Ayisyen ap viv nan peyi Brezil , daprè chif Polícia Federal (PF). Yon bon pati nan konpatriyòt sa yo ap viv nan eta São Paulo (Sidès) kote nouvo kowonaviris la (Sars-CoV-2) deja touye 4 688 moun, daprè bilan otorite lasante yo pataje samdi 16 me a. Ak chif sa yo, São Paulo depase kantite moun kovid-19 touye Lachin, peyi kote epidemi an te premye eklate. Ofisyèlman peyi asyatik la anrejistre 4 633 kadav akoz maladi a.

Yon lopital São Paulo plen ak malad Kovid-19 ( foto o Globo)

Kantite moun ki entène nan lopital São Paulo deja depase 10 100, pami yo 3 922 nan swen entansif, daprè presizyon gouvènè eta a João Dória. Majorite moun ki mouri nan eta a (72,9%) se pèsonaj ki gen plis pase 60 lane.

Rio de Janeiro, yon lòt eta ki gen anpil ayisyen, deja anrejistre ofisyèlman 2 614 mò epi 21 601 moun kontamine. Lopital ak lòt enfrastrikti sanitè piblik Rio de Janeiro yo prèske pa gen plas pou resevwa malad Kovid-19 ankò.

Gen lòt kat (4) eta kote epidemi an gentan touye plis pase mil moun. Ceará (1 614), Pernambuco (1 461), Amazonas (1 375) epi Pará (1 200).

Nan tout Brezil, nouvo kowonaviris la deja touye ofisyèlman 15 633 moun, daprè dènye bilan ki pibliye aswè samdi 16 me a. 816 moun mouri pandan dènye 24 èd tan yo. 233 142 moun deja kontamine. Brezil se 4° peyi kote viris la enfekte plis moun dèyè Etazini, Larisi ak Wayòm Ini.

Kreyòl Enfo

0 comment