Kreyòl Enfo, 23 desanm 2019 .- Jackson Alexandre, 39 lane, Sirismé Jacky alias Mayko, 33 lane, ak Deshommes Wilton, 21 lane, se 3 jèn gason lapolis nan depatman Latibonit la prezante, jounen lendi 23 desanm 2019 la, kòm manm baz » Gran grif « , yon gwoup gang k ap simen latwoublay nan lokalite Savyen ak kèk lòt zòn nan depatman Latibonit la.
Pòt vwa Lapolis la nan vil Gonayiv, Max Saint Preux, eksplike ajan fòs lòd yo rive mete men nan kòlèt mesye sa yo gras ak kolaborasyon popilasyon an. Enspektè ankouraje tout bon sitwayen kontinye pataje enfòmasyon ak otorite yo pou ride yo kwape tout zagoloray k ap fè dezòd nan depatman an.
Baz Gran grif se yon group jèn gason ak jèn fanm ki pran plezi nan detounen kamyon machandiz, kidnape ak touye moun, daprè rèsponsab Lapolis la. Mwa pase a, gwoup bandi sa yo te kidnape depite sikonskripsyon Gwomòn nan, Fritz Chéry.
Kreyòl Enfo