Kreyòl Enfo, 29 mas 2020 .- Ansyen gadyen peyi Tiki Rustu Reçber, 46 lane, entène lopital aprè li te fin kontamine ak nouvo kowonaviris la, daprè enfòmasyon madanm li, Isil Reçber, pataje sou rezo sosyal yo.
Isil ekri « m ta renmen bay yon pi bon nouvèl, men, pou rete nan limyè reyalite a, mwen regrèt pou m anonse nou mari m kouche sou kabann lopital ak kovid-19. Tout bagay te nòmal epi britsoukou li kòmanse devlope sentom yo. Nou tout te sezi. N ap viv yon moman difisil anpil».
Madanm Rustu fè konnen rezilta egzamen li menm ansanm ak timoun yo negatif. Li mande « konsyans ak respè » pandan move moman fanmi an ap pase a.
Ansyen gadyen Rustu Reçber se jwè ki pote plis koulè mayo seleksyon peyi Tiki a. Li te youn nan zatwal Mondyal 2002 yo kote Tiki te jwe ak Brezil pandan 2 fwa. Rustu te pote tou koulè Foutbòl Klèb Baselòn (FC Barcelona).
Kreyòl Enfo