Home Entènasyonal Ronaldinho Gaúcho fè 5 gòl pandan yon match nan prizon Paragwe

Ronaldinho Gaúcho fè 5 gòl pandan yon match nan prizon Paragwe

by Kreyòl Enfo

Kreyòl Enfo, 13 mas 2020 .- Ansyen zetwal seleksyon foutbòl Brezil la, Ronaldinho Gaúcho, ki fèmen nan prizon depi yon semèn nan peyi Paragwe patisipe nan yon match foutbòl ak prizonye yo nan Agrupación Especializada.

Daprè sa jounal paragweyen « Hoy » rapòte, krak brezilyen an te resevwa envitasyon pou patisipe nan yon tounwa foutbòl prizonye yo t ap òganize, men li pat aksèpte. Boutofen, li aksèpte jwe yon match amikal.

Toujou daprè jounal la, Ronaldinho te jwe nan ekip Fernando Gonzalez Karjallo, ansyen prezidan Sportivo Luqueno, que li menm tou nan prizon nan menm lokal la.

Ansyen nimewo 10 « seleção » la make senk (5) gòl ak delivre sis (6) pas gòl pou ekip li a ki bat 11-2. Pandan match sa, Ronaldinho lage depite Miguel Cuevas ki nan prizon pou kòripsyon sou dèyè ak yon drib.

Lajistis nan peyi Paragwe voye jete, jodi vandredi a, yon lòt demand avoka Ronaldinho yo te fè pou mande voye l nan prizon lakay li. Ronaldinho Gaúcho ansanm ak frè li Roberto de Assis fèmen nan prizon Paragwe pou yon dosye fo paspò.

Kreyòl Enfo

0 comment