Kreyòl Enfo, 29 avril 2020 .- Rezo nasyonal medya nimerik yo (RENAMEL, sig nan lang franse) kondane ak tout fòs li zak vyolans yon gwoup polisye fè sou jounalis Georges Emmanuel Allen, madi 28 avril la, nan Dèlma 33. Rezo a raple pratik sa yo pa marande ak egzijans demokrasi a.
RENAMEL raple li nesesè pou otorite yo garanti pwoteksyon jounalis ak medya yo nan tout peyi a pandan li siyale zak maspinay polisye yo fè sou Georges Allen nan reprezante yon pwovokasyon kont libète pou tout moun jwenn enfòmasyon.
RENAMEL mande pou otorite lapolis ak lajistis yo pini tout polisye ki te patisipe nan maspinen jounalis la. Rezo a egzije tou reparasyon pou redaktè Haiti24 la.
Georges Emmanuel Allen te resevwa plizyè pataswèl anba men yon gwoup polisye, aswè madi 28 avril la, devan lopital lapè, Dèlma 33. Polisye yo te pran pretèks jounalisla pat rèspekte kouvrefe ki entèdi moun pran lari aprè 8tè nan aswè a.
RENAMEL pwofite nòt pwotestasyon sa pou voye senpati li bay tout kolaboratè ak kòlèg jounalis Georges Allen ki pou kounye a ap soufri ak gwo doulè lakay li.
Kreyòl Enfo