Reginald Boulos mande Leta ayisyen sispann peye Venezyela dèt PetwoKaribe a 

Biznisman Reginald Boulos mande Prezidan Repiblik la, Jovenel Moïse, pou li fè yon kanpe touswit sou lajan Leta ap remèt gouvènman venezyelyen nan kad pwogram PetwoKaribe a jiskaske bon jan limyè blayi sou fason lajan an te depanse.

Nan yon lèt li voye bay Chèf Leta a, samdi 8 septanm lan, Reginald Boulos di gen twòp bagay ki pa parèt twò klè bò kote ofisyèl ayisyen ak venezyelyen ki te siyen kontra PetwoKaribe a sa ki mete anpil dout sou kantite lajan Ayiti dwe peyi Venezyela.

Doktè Boulos di li sispèk deklarasyon ansyen anbasadè Venezyela Pedro Antonio Canino Gonzalez ki te di lajan pwogram PetwoKaribe a te byen depanse nan peyi Ayiti pandan tout moun konnen gen anpil kont mal taye ki fèt ak lajan pwogram nan.

Patwon Delimat la kwè Leta ayisyen pa dwe bay Venezyela yon penich toutotan lajistis poko mennen bon jan ankèt epi fouke tout moun ki gen dwèt yo tranpe nan gagote lajan PetwoKaribe a.

Reginald Boulos mande tout òganizasyon entènasyonal k ap batay kont kòripsyon pou apiye Ayiti nan demach sa.

Pou fini, Reginald Boulos konseye Chèf Leta a itilize lajan dèt PetwoKaribe a pou chanje kondisyon lavi pwofesè, polisye ak pwofesyonèl Lasante yo .

Kreyòl Enfo