Kreyòl Enfo, 18 janvye 2021.- Gwo mouvman pwotestasyon nan vil Ench (Plato Santral) maten lendi 18 janvye a kote sitwayen yo ap reklame kouran elektrik. Abitan yo bloke wout nasyonal nimewo 3 a ( RN3) ak divès ri nan vil la epi boule kawoutchou pou anpeche sikilasyon machin ak motosiklèt.
Pwotestatè yo ki pat kache kòlè yo di se pa posib pou Plato Santral ap benyen nan blakawout pandan santral elektrik Pelig la tabli nan depatman an. Sitwayen yo fè kwè se premye fwa vil Ench gen pwoblèm kouran sa depi plizyè dizèn lane.
Malgre prezidan Jovenel Moise kontinye ap klewonnen l ap travay pou bay kouran 24/24 nan peyi a, prèske tout depatman yo ap fè fas ak gwo blakawout. Daprè anpil espesyalis, pwoblèm kouran sa ogmante fenomèn ensekirite ki anvayi peyi a.
Kreyòl Enfo