Kreyòl Enfo, 8 jen 2020 .- Polisye ki reyini nan gwoup «Fantom 509» anonse 3 jounen mobilizasyon pou 11, 12 ak 13 jen 2020 an. Mouvman gwoup polisye sa yo jwenn sipò sendika Polis Nasyonal Ayiti (SPNH-17).
Youn nan manm «Fantom 509» yo presize pou redaksyon Kreyòl Enfo 3 jounen mobilizasyon sa rantre nan kad mouvman pou egzije liberasyon kòlèg yo Alexandre Jean Pascal epi bon kondisyon pou yo travay sitou nan moman epidemi kowonaviris la.
«Fantom 509» mande tou pou lajistis anile mezi pou entèdi chèf sendika Polis Nasyonal Ayiti (SPNH-17), Yanick Joseph, kite peyi a. Yo kwè mezi sa rantre nan kad pèsekisyon gwo zotobre nan pouvwa a ap fè kont polisye yo.
Ayè dimanch la, deblozay te pete nan lari komin Pòtoprens ak Dèlma pandan ajan fòs lòd sou machin blennde t ap itilize gaz pou kraze manifestasyon Fantom 509 ak alye li yo. Pou pi piti 3 jounalis blese pandan ensidan sa.
Komisè gouvènman Pòtoprens la, Mét Jacques Lafontant, te entèdi semèn pase a tout manifestasyon nan lari pandan peryòd etadijans sanitè a. Mèt Jacques Lafontant prevwa gwo sanksyon kont tout moun ki pa koube anba desizyon sa .
Kreyòl Enfo