Pozisyon « Core group  » la sou mobilizasyon kont pouvwa Tèt Kale a

Kreyòl Enfo, 10 fevriye 2019 .- Nan yon kominike ki parèt, jodi dimanch la, anbasadè Etazini ak lòt peyi ki konpoze « Core group » la kondane zak vyolans ki rive pandan manifestasyon yo epi raple eleksyon se sèl mwayen pou chanje otorite politik yo.

Kreyòl Enfo envite nou li sak nan kominike sa.

CORE GROUP Kominike pou laprès

10 fevriye 2019

Core Gwoup la (ki konpoze ak reprezantan espesyal Sekretè Jeneral Nasyonzini an, anbasadè peyi Almay, Brezil, Kanada, Espay, Etazini, Lafrans, Inyon Ewopeyen ak Reprezantan Espesyal Òganizasyon peyi nan Amerik yo) pran nòt sou demann manifestan yo pandan jounen pwotestasyon 7 fevriye 2019 la.

Core Gwoup la regrèt moun ki mouri yo ak domaj sou byen moun pandan zak vyolans yo ki pa akseptab. Core group la rekonèt pwofesyonalis travay pwofesyonèl lapolis la ap fè.

Manm Core group la mande tout aktè nan sosyete ayisyen nan ansanm ak premye lidè peyi a, pou angaje nan yon dyalòg konstriktif pou tout moun nan lide pou idantifye epi aplike solisyon reyalis epi dirab pou kriz politik ak ekonomi Ayiti a. Nan sans sa a, group la ankouraje gouvènman an pou mache prese ak refòm estriktirèl li yo pou ankouraje pi bon jesyon nan resous Leta yo, amelyore kondisyon lavi popilasyon an epi amelyore kondisyon pou envestisman nan bay bourad ak sektè pwodiktif yo, sèl mwayen ki kapab akselere kwasans lan nan peyi a.

Pandan nou repete ankò nan yon demokrasi, chanjman yo dwe fèt nan eleksyon, epi san vyolans. Core Group la mande pouvwa egzekitif la ak lejislatif la pou kolabore pou lwa elektoral la ak lwa finans pou ane fiskal 2018-2019 la ka adopte epi pibliye pi vit posib. Se sèlman nan aksyon sa yo eleksyon yo ki pwograme selon Konstitisyon an pou oktòb 2019 ka fèt nan yon fason ki lib, ki jis ak transparan, konsa yon vid enstitisyonèl ap evite.

Manm Core group la ankouraje aktè politik yo, espesyalman pati politik yo, pou fè tout efò pou asire fanm ak gason se patnè egal nan pwosesis devlopman demokratik yo ak konstriksyon yon nasyon Ayisyèn ini, fò ak enklizif.

Kreyòl Enfo